ME ÇDO KUSHT NË VERI

Nëse Serbia s’e pranon planin për zbatimin e marrëveshjes, atëherë Kosova në çdo formë do ta shtrijë autoritetin ligjor dhe Kushtetuese në Veri. Presim nga SHBA’të dhe BE’ja të bëjnë presion te pala serbe për jetësimin e planit të propozuara nga Zyra e Baroneshës Ashton. Takimi i njëmbëdhjetë mes Thaçit dhe Dacicit do të jetë vendimtarë për këtë proces dhe për Zyrat Ndërlidhëse. Ministri i Jashtëm Enver Hoxhaj flet për Express.

Ministri i Punëve të Jashtme të Kosovës, Enver Hoxhaj po pret që në takimin e radhës mes Kryeministrave Hashim Thaçi e Ivica Dacic të arrihet pajtimi për planin zbatues sa i përket marrëveshjen së arritur më 19 prill në Bruksel.

Në të kundërtën, Kryediplomati Hoxhaj paralajmëron se Kosova do të shtrij autoritetin ligjor dhe kushtetuese në Veri të vendit.

“Nëse Serbia e bllokon hartimin dhe zbatimi e një plani të tillë, ne në çdo formë, në çdo mënyrë do ta shtrijmë sovranitetin tonë në Veri. Prandaj, është më se e rëndësishme që Serbia ta kuptoj që pajtimi rreth planit zbatues dhe mbi të gjitha zbatimi i tij është në interes të saj dhe të rajonit”, ka thënë Hoxhaj, në një intervistë për Gazetën Express.

Kosova dhe Serbia kanë arritur një marrëveshje para tri javësh për të ndryshuar gjendjen në Veri, por se deri më tash nuk ka pasur asnjë hap drejt zbatimit të saj. Qytetarët në Veri nuk janë pajtuar të zbatojnë marrëveshjen, ndërkohë liderët në Beograd kanë dhënë vetëm deklarata se pajtimi i arritur në Bruksel do të shkoj deri në fund.

Sidoqoftë, Ministri i Jashtëm i Kosovës thotë se pa zbatimin e marrëveshjes nga ana e Serbisë, rruga e Beogradit drejt BE’së do të mbetet e bllokuar.

“Serbia nuk ka alternativë tjetër përveç se ta pranoj një plan të implementimit në takimin e radhës që do të ndodh mes dy Kryeministrave. Mbi të gjitha të lëviz në implementim të këtij plani, përndryshe do ta humbë njëherë e përgjithmonë shansin që ta merr datën për anëtarësim në BE. Është mese vendimtare, jo vetëm pajtimi i planit për implementim, por edhe zbatimi i tij në terren në një gjendje të matshme, para se në fund të qershorit vendet anëtare të BE’së të vendosin pro datës të Serbisë”, ka thënë Hoxhaj.

Sipas tij, vendimtare në hartimin e pastaj edhe zbatimin e marrëveshjes do të jetë presioni i BE’së dhe SHBA’së.

“Koha po kalon dhe ka shumë pak kohë. Jam shumë i sigurt se në ditët e ardhshme do të ketë hapa konkretë në takimet e radhës dhe Serbia do të detyrohet ta pranojë një plan implementues për marrëveshjen. Mendoj se Brukseli dhe Washingtoni si garantues i marrëveshjes do të përdorin të gjitha mjetet diplomatike në dispozicion që sa më parë të kemi një plan implementues dhe që sa më parë të kemi kushte për zbatimin e marrëveshjes”, ka shtuar ai.

Ndryshe, gjatë këtij muaji pritet të takohen përsëri Kryeministri i Kosovës, Hashim Thaçi dhe ai i Serbisë, Ivica Dacic për të folur për planin për zbatimin e marrëveshjes. Në delegacion i Prishtinës dhe Beogradit ka dështuar para disa ditësh të pajtohet për planin implementues të marrëveshjes.

Ministri Hoxhaj pret që takimi i radhës të jetë vendimtarë për sa i përket zbatimit të planit, të propozuar nga BE’ja për jetësimin e marrëveshjes së arritur mes dy vendeve.

“Besoj se gjatë takimit që do të ndodh në nivel të Kryeministrave Thaçi dhe Dacic të pajtohen për një plan implementues dhe pastaj u mbetet institucioneve të Kosovës dhe institucioneve ndërkombëtare siç është KFOR’i që ta zbatojnë një plan të tillë”, ka shtuar ai.

Ndërkohë, Ministri Hoxhaj ka treguar edhe për vizitën e delegacionit të Kosovës në Beograd në përpjekje për t’i qartësuar të gjitha çështjet që kanë të bëjnë me hapjen e Zyrave Ndërlidhëse.

Ai ka thënë se shumica e problemeve mes dy vendeve janë sqaruar sa i përket hapjes së këtyre zyrave, derisa pret që në raundin e njëmbëdhjetë të dialogut mes dy Kryeministrave të sqarohet gjithçka.

“Deri më tash, një delegacion i MPJ’së ka qenë disa herë në disa takime në Bruksel. Sot ka qenë për herë të parë në një vizitë të parë zyrtare në Beograd. Shumë çështje që kanë të bëjnë me atë se si duhet të themelohet Zyra jonë Ndërlidhëse në Beograd, çështjet që kanë të bëjnë me imunitetin, me lirinë e lëvizjes, me sigurinë, me tabelat dhe një mori e çështjeve pothuajse janë zgjidhur. Kanë mbetur edhe disa detaje dhe unë besoj se kjo temë mund të diskutohet, po ashtu, në takimin e radhës mes dy Kryeministrave”, ka thënë ai.

EXPRESS