Erdogan, thirrje mbështetësve: Protestuesit, plaçkitës. Jepuni leksion në zgjedhjet lokale

Kryeministri turk Rexhep Tajip Erdogan ka dënuar sërish protestuesit anti-qeveritarë, duke i quajtur “plaçkitës” dhe i bëri thirrje mbështetësve që t’u “japin protestuesve një leksion” gjatë zgjedhjeve lokale të vitit të ardhshëm.

Erdogan i bëri këto komente, në qytetin jugor të Adanasë, ku janë përleshur të shtunën në mbrëmje protestuesit pro-dhe anti-qeveritarë.

Erdogan iu bëri thirrje mbështetësve të tij që të mos angazhohen në dhunë, nderkohe qe protestat në Turqi kanë hyrë në ditën e dhjetë.

Dhjetëra mijëra demonstrues ishin në rrugët e Stambollit të dielën, nderkohe qe janë zhvilluar demonstrata në Ankara, Izmir, dhe qytete të tjera.

Në Stamboll, protestuesit dogjën goma dhe hodhën fishekzjarre ndaj policisë, e cila u përgjigj me gaz lotsjellës.

Qeveria këmbënguli të shtunën se protestat ishin “nën kontroll”. Dy protestues dhe një oficer policie janë vrarë gjatë 10 ditëve të protestave.

PANORAMA