Skandali i Ministrisë së Punës për reklamat e Sandrit. Ja si i merrte ato!

Prokuroria ka shpallur masën ‘arrest me burg’ për katër zyrtarë të Ministrisë së Punës, lidhur me shpërdorimet që kanë të bëjnë me evente dhe reklama të paguara nga kjo ministri.

Kleves Bitro, drejtori i Kabinetit të zotit Ksera, thotë se po bëhen kokë turku pasi kanë firmosur ato që u kanë dhënë.

Gazeta TemA ka botuar dy vjet më parë mënyrën se si Frangaj i merrte reklamat në këtë ministri.

Korrespodenca mes Frangajt dhe zëdhënëses së Kserës është fyese, banale, ordinere dhe njëkohësisht një tregues i banditizmit në sjelljen me paratë e publikut. Po e botojmë të plotë shkrimin:

Në nëntor të vitit 2010, ne publikuam një korrespondencë mes Frangajt dhe Juela Meçanit (FOTO POSHTE) për një fushatë publicitare.

Ish- zëdhënësja e kryeministrit Sali Berisha, Juela Meçani, u ripunësua si këshilltare pranë Ministrit të Punës dhe Çështjeve Sociale.

Gazeta Tema solli korrespondencën mes Juela Meçanit dhe Eduart Frangajt, duke shkëputur prej tyre vetëm pjesën e komunikimit zyrtar për çështjen e reklamave.

Është e frikshme të shikosh se si qeveria e kryeministrit “që ka informatizuar tenderat”, rezulton që jo vetëm të mos bëjë tendera, por të bëjë skandale me to, duke caktuar vetë kompaninë fituese, buxhetin, prodhimin dhe shpërndarjen e tyre.

Në korrespondencën mes Frangajt dhe Meçanit bien në sy disa elementë skandalozë të mënyrës se si funksionon qeveria e sotme. Skandali i parë është caktimi prej vetë fituesit të vetëshpallur të tenderit të buxhetit të tij.

Siç shihet në korrespondencë, Frangaj bën presion për një buxhet aq sa kërkon ai dhe si për ilustrim i tregon Meçanit se si “Ne në KM”, që do të thotë “Ne në qeveri”, kur kemi bërë spotet e tunelit për 6 ditë në katër televizione kemi marrë 100 milion lekë të vjetra.

Pra, komunikimi mes tyre dëshmon jo vetëm si po ndahen, por dhe si janë ndarë reklamat në qeverinë e Sali Berishës.

E gjitha kjo shoqërohet dhe me një distancë të kësaj dysheje nga administrata, të cilën në të vërtetë po rrjepin.

Po ta vësh re, zonja Meçani flet për Ministrin si për një shërbëtor, që ia “paska kërcitur dhe ka ikur në Selanik”, kurse Frangaj flet me arrogance e njeriut që i shikon nga lart, pasi siç thotë vetë “Ne në KM”, i bëjmë ndryshe punët.

Një tjetër detaj skandaloz i bisedës është dhe fjalori vulgar. Përdorimi i fjalëve vulgare nga Frangaj në komunikimin me shkrim dëshmon për një kulturë komunikimi mes njerëzve të Berishës dhe rrezaton thelbin e administratës së sotme.

Më pas TemA publikoi një skandal tjetër.

Ministri i Mbrojtjes, Arben Imami, i ka paguar agjencisë publicitare Promo shpk mbi 300 milionë lek për spote publicitare dhe për shkak të kufizimit të buxhetit dhe parregullsisë në prokurimin e tyre, Imami e ka bërë pagesën në emër të një reparti ushtarak me nr. 6660.

Gazeta Tema ka siguruar urdhër- pagesat nga Thesari i Shtetit për kompaninë e Frangajt, të cilat provojnë se ai ka marrë 310 milionë lek sipas urdhër- pagesave të mëposhtme.

Reparti ushtarak nr. 6660 ka paguar spot publicitar kompaninë e Frangaj, Promo me urdhër pagese nr. 680, datë 27.04.2012, për njoftimin nr 5827/1, datë 15.05.2012, kontratë nr. 524, datë 28.05.2012, me urdhër ministri nr. 810, datë 17.05.2012 dhe faturë nr. 55, datë 18.06.2012, seri 42678005.

Urdhër xhirimi është bërë në adresë të kompanisë PROMO në vlerën 31.070.000 leke, në datë 03.07.2012, e cila është ekuivalente me 227 mijë euro (FAKSIMILE POSHTE).

Tema