Ligjet, deputeti i PDIU thyen bojkotin

Deputetët e opozitës braktisin komisionet parlamentare, maxhoranca në vështirësi me numrat. Muhedini ndihmon socialistët të arrijnë kuorumin në Parlament. Bojkoti i paralajmëruar i deputetët të opozitës në mbledhjen e djeshme të Komisionit të Ligjeve e detyroi maxhorancën ta niste me 30 minuta vonesë shqyrtimin e projektligjit “Për masat kundër financimit të terrorizmit”. Ndonëse mbledhja ishte parashikuar të niste në orën 10:00, ajo nisi në 10:30, kur nga sekretaria e Komisionit u njoftua fakti se ishin të pranishëm 15 deputetë të pranishëm nga 29 që janë gjithsej. Por në 15 deputetët që ishin në mbledhjen e djeshme, njëri prej tyre ishte edhe ai i Partisë për Drejtësi, Integrim dhe Unitet, Tahir Muhedini.

Deputeti i PDIU duket se nuk ishte njoftuar për vendimin e opozitës për të bojkotuar mbledhjen e Komisionit dhe “i shërbeu” maxhorancës për ta llogaritur si pjesëmarrës në Komision për të bërë kuorumin e nevojshëm. Ai u largua nga mbledhja pas pesë minutash. Megjithëse maxhoranca e majtë ka 17 deputetë në këtë komision, përpara se të niste mbledhja të pranishëm ishin 13 prej tyre, derisa u arrit kuorumi i nevojshëm. “Mbledhjet e komisionit janë të vlefshme kur në to merr pjesë më shumë se gjysma e të gjithë anëtarëve të komisionit”, thuhet në pikën e parë të nenit 34 të Rregullores së Kuvendit. Më pas maxhoranca nuk e pati problem pjesëmarrjen e më shumë se gjysmës së anëtarëve të Komisionit, pasi në mbledhje erdhën deputetët e PS-së Blendi Klosi e Pandeli Majko, por edhe deputeti i Lëvizjes Socialiste për Integrim, Petrit Vasili.

Në mbledhjen e djeshme, veç deputetëve të Partisë Demokratike, nuk ishte i pranishëm edhe ish-deputeti i Partisë Republikane, Luan Duzha, i cili së fundmi është larguar nga kjo forcë politike dhe ka dalë i pavarur. Në të njëjtën kohë, në mbledhje nuk mori pjesë as kryetari i Partisë Demokristiane, Nard Ndoka, i cili një ditë më parë deklaroi për gazetën se ishte kundër bojkotit dhe do të merrte pjesë në shqyrtimin e 30 neneve të projektligjit për masat kundër financimit të terrorizmit. Gjatë javës së kaluar deputetët e Partisë Demokratike dhe aleatëve të saj nuk morën pjesë as në dy mbledhje të Komisionit të Veprimtarive Prodhuese dhe as në një mbledhje të Komisionit të Sigurisë. Vendimi i opozitës ka ardhur pas aktit të miratuar nga qeveria për shtyrjen e hyrjes në fuqi të ligjit për nëpunësin civil. Bojkoti pritet të vazhdojë edhe gjatë mbledhjeve të sotme në komisione, ndërkohë që pritet të shihet nëse PD-ja dhe aleatët e saj do të jenë të pranishëm në seancën e së enjtes.

Panorama