Ligji “urgjent dhe me porosi” mbi riciklimin e makinave të vjetra

Në edicionet informative të Top-channel-it dhe në versionin online të këtij televizioni bie në sy një scoop mbi riciklimin e makinave të vjetra. Ja një përbledhje e lajmit, që flet për lidhje të shkurtëra mes një biznesmeni të huaj dhe kryeministrit:

“Për herë të parë për çështjen e varrezave të automjeteve, kryeministri është shprehur në maj të vitit të kaluar, kur ëhstë shprehur, se “çdo varrezë e licencuar do të zhvendoset 5 kilometra larg rrugëve nacionale apo rajonale. Pas kësaj deklarate kjo ëështje mbeti në heshtje për më shumë se 1 vit, deri në fillim të shtatorit të këtij viti, kur qeveria papritur iu rikthye sërish problemit të varrezave.

Në datën 7 shtator në mbledhjen e qeverisë u miratua një akt normativ, i cili kërkonte zhvendosjen urgjente të varrezave për automjetet e dala jashtë përdorimit, por këtë herë projekti i qeverisë kishte ndryshuar dhe distanca nga rrugët nuk ishte më 5 kilometra.

Një javë pas miratimit të aktit normativ, më saktësisht në datën 13 shtator, kryeministri pret në zyrën e tij Rafael Bart-in, drejtorin ekzekutiv të kompanisë gjermane Scholz, e cila në Xhafzotaj të Durrësit ka ndërtuar një fabrikë të fuqishme për riciklimin e skrapit. Takimi konfirmohet edhe nga faqja zyrtare e vetë qeverisë. Dy javë më vonë qeveria dërgon në parlament për votim, fillimisht në komisione e më pas në seancë plenare, ligjin për manaxhimin e integruar të mbetjeve, varianti fillestar i të cilit ishte përgatitur që një vit më parë, në shtator të 2010-ës.

Ligji që në themel të tij i hap rrugën në heshtje importit të automjeteve në fund të jetës, me qëllim riciklimin e tyre në Shqipëri, gjë e ndaluar deri më sot. Dyshimet lidhen pikërisht me kompaninë Sholz dhe kapacitetin përpunues të fabrikës që ajo ka në Xhafzotaj. Kjo kompani, e cila ka mbërritur në Shqipëri para disa vitesh, u  regjistrua si biznes shqiptar në Qendrën Kombëtare të Regjistrimit në vitin 2008. Menjëherë pas kësaj filloi ndërtimin e fabrikës gjigante, që do të riciklonte skrap dhe mbetje të tjera të ngurta. Pas përfundimit të fabrikës, në mars të këtij viti Sholz siguron lejen mjedisore nga Ministria e Mjedisit. Top Channel zotëron lejen mjedisore, ku zbulohet se kapaciteti riciklues i fabrikës është 800 tonë skrap në orë. Në relacionin shoqërues të ligjit për mbetjet thuhet se stoku total i mbetjeve të skrapit nga automjetet e përdorura në gjithë vendin llogaritet në 120 mijë tonë.

Edhe nëse fabrika do të punonte vetëm 5 orë në ditë, me këtë kapacitet do të mjaftonte vetëm një muaj, që ajo të riciklonte të gjithë rezervat e skrapit që janë krijuar në 20 vite nga automjetet në Shqipëri. Shifrat që jep vetë Ministria e Mjedisit tregojnë se Shqipëria krijon mesatarisht 6 mijë tonë mbetje skrapi nga automjetet në vit, kapaciteti riciklues i kompanisë është aq i madh sa mund ta përpunojë atë vetëm në një ditë. Kjo do të thotë se kompanisë do i duhet lëndë e parë skrapi, për të cilat opozita dyshon se do vijnë nga importi, që qeveria e lejoi vetëm pak ditë më parë.”

Re.Pu.