Dështon ankandi për 3G-në e tretë, kompanitë japin oferta minimale

Ndodhi ajo që pritej, pas dy licencave 3G të dhëna deri më tani, asnjë kompani nuk mund të blinte të tretën, përsëri me të njëjtin çmim fillestar. Ankandi i sotëm i organizuar nga AKEP për shitjen e licencës së tretë dështoi për shkak se kompanitë e që morën pjesë në garë, “Eagle Mobile” dhe “PLUS”, dhanë çmime tepër të ulëta në raport me atë fillestar prej 12.5 milionë euro që kërkonte qeveria. Pas hapjes së ofertave, u mësua se “Eagle Mobile” kishte ofruar një çmim jo më të lartë se 3.55 milionë euro, ndërsa “PLUS” akoma më pak, 2.2 milionë euro.

Ofrimi i kompanive me një çmim të tillë është një sinjal i fortë ndaj autoriteteve për uljen e kostos nisur edhe nga zhvillimet në treg, i cili nuk është i njëjtë me periudhën kur u shiten dy licencat e para. Krahas kësaj, duket se më shumë se me dhënien e ofertës, kompanitë nuk kanë dashur t’i prishin qejfin qeverisë duke marrë pjesë në ankand, por me oferta shumë larg çmimit të pritshëm.

Licenca e parë për shërbimin 3G u ble në vjeshtën e vitit 2010 nga Vodafone me një çmim prej 31.4 milionë euro, ndërsa licence e dytë iu shit AMC-së kundrejt 15.1 milionë eurove.

S.E.