Shqiptarja.com: Basha ka ndërsyer taksidarët e vet kundër medias kritike

Shqiptarja.com i ka kushtuar dy faqe lajmit të lajmëruar në faqe të parë me titull ‘Basha s’duron dot më, sjell taksidarët tek shqiptarja.com’. Kjo e përditshme, e financuar nga botuesi italian Carlo Bolino, ka shtatë muaj që është në treg, dhe këto ditë në dyert e saj kanë trokitur për kontroll njerëzit e Bashkisë së Tiranës. Kanë shkuar atje me një urdhër të Andia Pustinës, drejtoresha e departamentit të taksave e tatimeve. Ka ndonjë gjë që s’shkon në këtë mes? Sipas shqiptares.com, po. Në nenin 80, pika 4, të ligjit 9920 mbi Procedurat Tatimore, thuhet, gjithnjë sipas shqiptares.com, se “zgjedhja e tatimpaguesve që kontrollohen bëhet në bazë të analizës së vlerësimit të riskut të kryer nga administrata tatimore për të identifikuar tatimpaguesin që ka më shumë gjasa ta shkelë legjislacionin tatimor”.

Në raportimin e gazetës shqiptarja.com, e cila njihet si një nga kritiket më të forta të pushtetit dhe të mënyrës se si po administrohet bashkia e Tiranës, bëhet nënvizimi se ky është një kontroll selektiv i motivuar politikisht në një biznes, që s’ka mbushur ende një vit, dhe lihet të kuptohet se një kontroll i tillë nuk bëhet asnjëherë në gazetat që janë vënë në mbështetje të bashkisë apo qeverisë, e që kanë për pronarë njerëz të lidhur ngushtë me kryeministrin e kryebashkiakun.

Re.Pu.