"Sikleti" i bankës Credins dhe paniku i depozitorëve

Fill pas publikimit të lajmit mbi sekuestrimin konservativ të aseteve të bankës Credins (në lidhje me fondin prej 75 milionë eurosh që një bankë azerbajxhanase kishte dhënë për privatizimin e ARMO-s), u vu re një fluks i rritur i klientëve në degët e saj. Nuk dihet nëse ata kanë qenë depozitorë që kanë dashur të tërheqin paratë e tyre nga frika se kjo bankë mund të falimentojë, por e kaluara e afërt na tregon se një gjë e tillë ndodhi me Bankën Shqiptaro-Amerikane (sot Intesa San Paolo) në vitin 2008. Dhe shkak u bë falimentimi i bankës gjigande amerikane të investimeve "Lehman Brothers". Ato dy banka nuk kishin asnjë farë lidhje me njëra-tjetrën, por depozituesit shqiptarë u turrën në Bankën Shqiptaro-Amerikane për të tërhequr depozitat e tyre... Dhe u desh ndërhyrja e fuqishme e Intesa San Paolos, e cila sapo e kish blerë Bankën Shqiptaro-Amerikane, që ajo të mos zhytej.

Historia ka treguar se nuk ka armik më të rrezikshëm për një bankë se sa paniku i depozitorëve. Në qoftë se shumica dërrmuese e tyre turret për të tërhequr depozitat, banka ka normalisht gjendje vetëm 10-20% të parave - pjesën tjetër e ka dhënë kredi ose e ka përdorur për të blerë bono thesari. Në rastin e bankës Credins nuk ka një bankë mëmë si Intesa San Paolo që të ndërhyjë. Pra, mbetet që ose drejtuesit e saj të distancohen publikisht dhe zyrtarisht nga ARMO, ose banka azerbajxhanase të deklarojë se do të marrë në kontroll të plotë bankën Credins, në qoftë se gjykata ia jep asetet e saj.

Pasiguria sjell vetëm panik...

E.Zaloshnja