"Pafajësia e Myslimanëve", ka diçka për të thënë edhe myftiu i Shkodrës

“Pafajësia e myslimanëve”, filmi amator që ka sjellë revoltat e dhunshme antiamerikane të ditëve të fundit – merr reagimet e para edhe në Shqipëri. Ato vijnë nga Shkodra. Myftiu i atij qyteti e ka përmendur filmin në fjalë gjatë asaj që quhet “falja e hytbes të premten” në Xhaminë e Medresesë së Djemve në Shkodër. Kleriku - (quhet imam Muhamet Sytari) - e ka cilësuar këtë film si “fyerje” duke theksuar se është një gjë e gabuar “të ndërhysh në shenjtërinë e të tjerëve”.

Sipas medieve lokale të Shkodrës, TV 1 Channel dhe TV Rozafa myftiu shkodran është shprehur: “Kështu jemi të alarmuar të gjithë ne dhe duhet të alarmohemi në këto ditë kur shohim dhe dëgjojmë se ata të cilët u përpoqën ta vrisnin dhe ta eliminonin fizikisht Pejgamerin tonë sa ishte gjallë, sot kanë bërë një film, filmin e turpit të tyre. Dikur bënin karikatura dhe karikaturat u dolën për hundësh atyre dhe kujdestarëve të tyre. Tani bënë një film. Ato të cilët menduan të lëndonin Pejgamerin tonë, në të vërtetë kanë prekur shenjtërinë e çdo feje në këtë botë...”.

Kleriku në fjalë njihet për faktin që në ritet javore lokale ndërton fjalime të bazuara edhe në debatet politike të ditës. Gjatë ditëve të përmbytjes së qytetit vitin e kaluar gjatë ritit tradicional të së premtes Sytari iu drejtua kryetares së Kuvendit, Topalli: “Nuk çmenden lumenjtë zonja kryeparlamentare, por janë njerëzit që janë çmendur, ashtu siç ndodhi më 1967-n”. Një ditë më parë Topalli, teksa fliste lidhur me situatën në Shkodrën e përmbytur ishte shprehur: “Lumenjtë janë çmendur, janë tërbuar. Nuk kishte ndodhur ndonjëherë më përpara ajo që po ndodh, ka dy muaj që po na bie shi pa pushim”. – A.N.