Albana Shtylla dhe Denar Biba, dy emrat e PS për në KQZ

Partia Socialiste ka propozuar ditën e sotme 2 emra për në anëtarësinë e Komisionit Qendror të Zgjedhjeve. Selia rozë bëri të ditur se 2 emrat janë Denar Biba dhe Albana Shtylla (në foto), të dy juristë të rinj, i pari me eksperiencë administrative në Gjykatën Kushtetuese, i dukshëm edhe publikisht me artikuj të herëpashershëm, botuar kryesisht tek "Panorama", - kurse e dyta me eksperiencë në drejtime kabinetesh në ministri dhe institucione kushtetuese, së fundmi drejtore kabineti e Avokatit të Popullit.
PS dhe PD kanë të drejtë të propozojnë secila nga dy anëtarë në KQZ, ndërsa dy anëtarët e tjerë (njëra nga secila parti) do të dalin nga PBDNJ-ja si forca e dytë e koalicionit opozitar dhe LSI-ja, si forca e dytë e koalicionit qeverisës.
Anëtari i pestë i KQZ-së zgjidhet nga kandidatura të propozuara nga grupime deputetësh të partive të shumicës parlamentare, përjashtuar partinë më të madhe të grupimit të shumicës. Anëtari i gjashtë i KQZ-së zgjidhet nga kandidatura të propozuara nga grupime deputetësh të partive të opozitës parlamentare, përjashtuar partinë më të madhe të opozitës”, thuhet në germën “ç” të nenit 14 të Kodit.