Berisha ka në kokë një skenar arrestimesh?

Andrea Stefani mendon që Berisha ka në kokë një skenar arrestimesh. Dhe kjo do provohet sipas tij, nga

koha kur do largohet Ina Rama, më saktë nga këmbëngulja te përpjekja për ta larguar atë patjetër këtë nëntor. Duke folur për rreziqet që mbart kufizimi i imuniteteve në kushtet kur nuk ka një gjyqësor të pavarur dhe kur së shpejti, për shkak të ndryshimeve të Kushtetutës, Berisha bëhet gati të vendosë një delfin të tij edhe në krye të prokurorisë - në një intervistë me Adrian Thanon botuar sot në të përditshmen "Shekulli", Stefani thotë:

"…Opozita ka qenë e qartë për rreziqet që mbart kufizimi i imuniteteve në këto kushte... Por në kërkesën e saj të drejtë ajo nuk ka patur mbështetjen e ndërkombëtarëve. Unë nuk mund të eci me optimizmin bosh që qarkullon këto ditë në formën: Berisha nuk bën më nga ato budallallëqet e dikurshme kur plaste në burg kreun e opozitës Fatos Nano. Mendoj se Berisha mezi pret të marrë zyrën e kryeprokurorit. Do ta përdorë jo vetëm për të bërë shantazh mbi opozitarët por edhe për të përmirësuar disi bilancin me tolerancë jo “0” por 100% përsa i përket korrupsionit të madh në nivel deputetësh, ministrash, zv.kryeministrash dhe kryeministrash. Ajo që sapo shprehu Topalli tregon se ka një skenar “antikorrupsion” për ca koka turku në nivel deputetësh dhe zv.ministrash. Kjo gjë nuk do të ndodhë, të paktën para zgjedhjeve të vitit 2013, nëse Berisha pranon që mandati i Ina Ramës nuk mbaron në nëntor të këtij viti por në maj të viti që vjen. Nëse Berisha këmbëngul ta largojë Ina Ramën në nëntor, ky do të jetë treguesi së ai ka në kokë një skenar gjuetie shtrigash kundër opozitës që për “paanshmëri” do balancohet edhe me ca koka turku në nivel zv.ministrash. Nëse nuk duan që kjo të ndodhë, ndërkombëtarët duhet të ngulin këmbë që kryeprokurori i ardhshëm të jetë një jurist i zgjedhur me konsensus ashtu sikundër pritet të bëjnë për kreun e KQZ…"