Malaj duhet të ketë një lidhje goxha të fortë me telefonin e tij celular

Shtypi i sotëm është mbushur me një ankesë të Arben Malajt për një vendim të organizatorëve të mbledhjes së Asamblesë së PS që telefonat celularë nuk duhet të punojnë gjatë kohës që punon Asambleja. Ka thënë Malaj në një intervistë me gazetarin Ilir Babaramo në News 24:

"Veprimi i ndërprerjes së sinjalit telefonik në një mbledhje ku ka 350 njerëz ku u vendos zhurmues për të mos patur akses telefoni, kjo për mua është e rrezikshme dhe e papranueshme. Ka disa individë që mendojnë se do të vijnë në pushtet duke cënuar dhe të drejtat më elementare të demokracisë"

Heu! Ose Malaj e paska vërtet shumë zët të jetë në ambjente ku telefoni celular nuk punon, ose listat e deputetëve të 2013-s nuk janë ato të zakonshmet.

Ka edhe dicka tjetër që duhet analizuar disi dhe kjo ka lidhje me median. Që nga Panorama e deri te Standardi nuk kishte gazetë në tezgat e shtypit ku të mos lexohej me gërma të mëdha i njëjti titull për Malajn dhe celularët e palejuar në mbledhjen e socialistëve. Situata, (ka ndodhur edhe herë të tjera) duket disi e telekomanduar. Ndryshe duhen bërë disa pyetje: është e mundur që nga një intervistë e gjatë televizive të gjithë k/redaktorët të zgjedhin njëherësh për editim të njëjtin paragraf? Kanë lidhje telepatike njëri me tjetrin? Apo telefonat e tyre celularë, i "zhurmon" e njëjta dorë që e bën qimen tra në PS sa herë bëhet fjalë për Ramën? - A.Th.