Le të gëzojmë jetën sa më shumë që mundemi, sepse së shpejti Europa do të jetë vetëm një kujtim?

"Brez i humbur"? Politikanët e kanë trajtuar këtë term me shumë kujdes, deri ditën kur kryeministri italian, Mario Monti e theu komplotin e heshtjes. "Ju jeni një brez i humbur", -  u tha Monti bashkatdhetarëve të tij në moshë të re. "E vërteta, fatkeqësisht, nuk është e bukur, por merreni këtë si mesazh shprese - në kuptimin e transformimit dhe përmirësimit të sistemit dhe që mund t’u jepet të rinjve që do të vijnë pas disa viteve".

Kancelarja gjermane Angela Merkel dhe kryeministri britanik David Cameron mund të kishin përdorur të njëjtat fjalë, por ishte Monti që e hapi rrugën. Kjo do të thotë se së shpejti udhëheqësit do të fillojnë të flasin për "lajme të këqija-të mira" në mënyrë që të rinjtë të harrojnë jetën e lehtë që kanë gëzuar prindërit e tyre. Le t’i themi gjërat hapur: faji për krizën që ka mbërthyer Europën është i elitave aktuale, politike dhe intelektuale. E tyrja është një gjeneratë udhëheqësish të rritur në një “pallat  të kristaltë", - shkruan Jarosław Makowski filozof dhe teolog që drejton një think-tank në Varshavë.

Makowski mendon se përballë pasivitetit të elitës, vetëm të rinjtë  të kërcënuar nga pasiguria e jetës, mund të ndryshojnë trendin e rënies europiane. Dhe bën një dallim të qartë mes brezave.

Shkruan Makowski: "Europa është krijuar dhe ndërtuar nga një brez me një të kaluar tragjike, mishëruar nga vende si Aushvic. Etërit themelues të Bashkimit Europian - Konrad Adenauer, Robert Schumann ose Alcide De Gasperi - e dinin se vetëm duke punuar së bashku mund të bënin diçka të dobishme dhe të qëndrueshme. Në këtë kuptim, solidariteti europian ka qenë një bekim. Ndërsa udhëheqësit aktualë kanë jetuar në një mënyrë krejtësisht të ndryshme. Kanë pasur paqe, siguri dhe kushte jetese tejet të mira falë një shteti social të arsyeshëm. Atëherë si është e mundur që pas një suksesi spektakolar erdhi një fiasko po aq i bujshëm? Motivi është i thjeshtë: elitat e sotme mendojnë se e kanë të trashëguar BE- në nga paraardhësit e tyre, kur vetëm sa e  kanë huazuar dhe së shpejti do të duhet t’ua kalojnë atë fëmijëve të tyre. Mentaliteti i personave që tani drejtojnë Europën mund të përmblidhet në një fjali: "Le të gëzojmë jetën sa më shumë që mundemi, sepse së shpejti Europa do të jetë vetëm një kujtim."  (a.thano)

Artikulli në origjinal:
http://wyborcza.pl/magazyn/1,128599,12704515,Pokolenie_Erasm...
Në foto:
Mural në qendrën sociale Casablanca në Madrid, tetor 2012