Skandal: Vdekja e 2 minatorëve i lë indiferentë gazetarët e shtypit

Dje, në një minierë të Krastë Martaneshit, në thellësinë 800 metra, kanë gjetur vdekjen dy minatorë, Vehbi Stafa, 58 vjeç dhe Ermal Elezi, 25 vjeç. Kanë dashur të realizojnë një shpërthim rutinë, dhe në rrethana ende të pandriçuara ka ndodhur – kështu thuhet në një nga shumë pak agjencitë e lajmeve që janë marrë me këtë ngjarje – një shpërthim tjetër i fuqishëm, që u ka marrë jetën të dyve.

Ripërsërisim: mass-media është marrë shumë pak me këtë lajm. Gazetat e sotme kanë informuar në detaje mbi konventën e LSI-së, mbi shkarkimin e pritshëm të Ina Ramës, mbi kuturisjet prej historiografi të kryeministrit tonë, mbi kontrollin e pamundur parlamentar në ministrinë e mbrojtjes, etj, dhe vetëm pak prej tyre i kanë kushtuar një vëmendje të ndrojtur ngjarjes tragjike brenda një miniere (nuk është hera e parë që ndodh kjo gjë). Asnjëra prej gazetave kryesore nuk e kish lajm të parë. Mapo e kish në plan të dytë a të drejtë, dhe me këtë shënohet kulmi i vëmendjes. Panorama e njoftonte si lajm në faqe të parë në kolonën e vet në të majtë. Shqipi e kish gjithashtu në faqe të arë, por do duhej të hiqje ca për ta vënë re. Ndërsa Shqiptarja.com, Gazeta Shqiptare dhe Shekulli nuk ishin marrë fare me të.

Re.Pu.