Ai që qëlloi Dulen me vezë është pedagog dhe punonjës administrate. Nuk jam nga barkpangopurit e fushatave - thotë

E përditshmja MAPO ka intervistuar një nga ata që kanë qëlluar me vezë makinat e delegacionit grek që shkonte për të marrë pjesë në ceremoninë përkujtimore të ushtarëve të rënë në luftën italo-greke në territorin shqiptar. Thotë që ai ka karkuar t’i ruhet anonimati sepse punon në administratën shtetërore dhe është pedagog i jashtëm në një universitet privat. Është personi që qëlloi katër herë kundër makinës së kreut të PBDNJ-së, Vangjel Dule, - editon MAPO. Vetë i intervistuari e prezanton veten dhe arsyet e veprimit të tij me fjalët:

“Unë jam çam nga ana e babit. Gjyshi dhe gjyshja ime (nga ana e babit) kanë lindur në Çamëri dhe kanë ardhur këtu në moshë fare të re. Gjyshi ka qenë (sepse tani nuk rron më) nga Vrohonai, fshat shumë afër Igumenicës, ndërsa gjyshja nga një fshat me emrin Nista, po afër Igumenicës. Nëse grekët duan që të qajnë ushtarët e tyre në Shqipëri, atëherë edhe ne duam që të shkojmë dhe të qajmë gjyshërit tanë në Çamëri. Boll më, me një shtet që i plotëson çdo tekë grekut. Duam reciprocitet. .. Unë personalisht kam dy punë, dhe të ardhurat e mia janë mjaft të mira. Si mendon ti, që një njeri si unë mund të “përdoret” ashtu siç thotë Dulja. Zoti Dule kujton se janë të gjithë si ata bark pa ngopurit, që përdor ai nëpër fushata..” A.N.