Eshtë vullneti i 300 mijë qytetarëve përballë atij të Saliut, - thotë Rama duke folur për 'Fierin'

I pyetur nga gazetari Sokol Balla mbrëmë në një intervistë televizive në TCH lidhur me votimin e tre ligjeve të kërkuara nga KE, lideri i opozitës Edi Rama tha:

"Ne jemi tërësisht të gatshëm që të japim kontributin siç e kemi thënë për të gjithë paketën e ligjeve që çuan tek statusi i kushtëzuar. Nëse ka pasur progres Shqipëria gjatë këtij viti, ky ka qenë progresi në legjislacion. Nuk ka pasur progres as në luftën ndaj korrupsionit, as në cështjen e pronave apo krimit të organizuar dhe as me drejtësinë apo administratën publike. Një nga këto çështje që është sundimi i ligjit, ka të bëjë drejtpërdrejtë me zbatimin e vendimit të Gjykatës së Lartë për Fierin. Vullneti i 300 mijë qytetarëve nuk mund të shkelet arbitrarisht dhe kjo është ajo që ne kërkojmë".

Ndërhyrjes së gazetarit: "Berisha ofroi opsionin e ri për zgjidhjen e ngërçit në Fier, mocionin për anëtarët dhe kryetarët e Qarkut", Rama iu përgjigj: "Kjo është antiligjore dhe antikushtetuese. Saliu nuk është mbi ligjin, pavarësisht se ai ka vendosur ndryshe. Ligji dhe vendimi i gjykatës është i qartë, ndaj nuk ka nevojë për mocion, gjykata e nënvizon gjithashtu këtë..." (A.N.)