Dekorim në prani të Berishës i ambasadorit Ryerson, i cili i ka sugjeruar daljen në pension…

Presidenti i Republikës dekori sot me Urdhrin “Gjergj Kastrioti Skënderbeu” ish-Ambasadorin e Shteteve të Bashkuara në vendin tonë, William E. Ryerson, me këtë motivacion: "Mikut të shqiptarëve, që dha kontribut të rëndësishëm në ringjalljen e marrëdhënieve diplomatike shtetërore midis Shqipërisë dhe Shteteve të Bashkuara të Amerikës dhe inkurajoi e mbështeti fuqishëm vendosjen e demokracisë në vendin tonë. Për ndihmesën e vyer në forcimin e marrëdhënieve miqësore, tradicionale ndërmjet popullit shqiptar dhe atij amerikan”.

Në ceremoninë e rastit ishte i pranishëm edhe Berisha, për të cilin Ryerson-i ka dhënë këtë këshillë para 5 vjetësh, në një intervistë të botuar në gazetën Panorama: “A duhet z.Berisha të dalë në pension? Siç e dini, unë jam amerikan dhe duke kërkuar në historinë e vendit tim për shembuj, më bën pershtypje ai i Xhorxh Uashingtonit. Pasi kishte shërbyer si gjeneral në Luftën e Pavarsisë, ai u zgjodh dy herë si President i SHBA-së. Dhe pas herës së dytë, Xhorxh Uashingtoni nuk kandidoi për herë të tretë. Ai kishte bërë shumë për vendin dhe ishte krenar për arritjet e tij, por sidoqoftë, zgjodhi pensionin. Mendoj se z.Berisha është në fakt në një situatë paralele - ai ka bërë shumë për vendin e tij, dhe e meriton të dalë në pension. Ky do të ishte një hap i mirë për demokracinë si brënda PD-së ashtu dhe më gjerë në Shqipëri. Kjo, sepse kështu do të hapej rruga për të tjerë që të marrin përsipër përgjegjësitë. Unë personalisht mund të konstatoj se jeta në pension s’është fare e keqe!”

Re.Pu.

Intervista e plotë: http://www.respublica.al/opinion/2011/09/21/rajerson-berisha...