Dashamir Shehi: Tek ne partitë janë të stilit komunist, janë struktura permanente, të rënda, luftarake, me seksione, …

Në të përditshmen Shekulli ishin dy intervista interesante në numrin e sotëm. E para i është marrë Ylli Rakipit (folëm për të në në shënimin me titull “Ylli Rakipi: A ka ndryshuar Berisha? Jo, kanë ndryshuar njerëzit që e thonë këtë gjë”), ndërsa e dyta i është marrë Dashamir Shehit. Ky i fundit është fokusuar (intervista është marrë nga gazetari Plarent Shehu) në gjendjen ekonomike dhe në atë politike. Përsa i takon buxhetit të sapomiratuar, ai flet për dy difekte. “Së pari, ky është një buxhet elektoral, dhe ky fakt në vetvete është difekt; dhe së dyti, ky është një buxhet i parealizueshëm, ngaqë bazohet mbi një rritje jo reale prej 4%-ësh”, thotë ai, duke shtuar pak më poshtë se debati për projekt/buxhetin nuk është serioz në rrethanat që vetë buxheti rishikohet më se njëherë gjatë vitit të ardhshëm.

Lidhur me gjendjen politike, Shehi thotë se “ne jetojmë në një sistem partiak, veçse shumë partiak e jo njëpartiak”, dhe po aty jep një nga arsyet që e bëjnë ta mendojë këtë gjë: “është ideja fikse se partia funksionon mbi bazë seksionesh, se partia është një strukturë permanente, se është një strukturë luftarake që duhet të jetë në shesh të betejës çdo ditë, si komitetet e vjetra të partisë”.

Intervista mbyllet me një opinion të Shehit mbi këto 22 vitet e fundit: “Ne jemi një shoqëri foshnjore në pikëpamje demokratike. Dhe si çdo foshnjë, për t’u rritur, na duhet të kalojmë kollën e bardhë, fruthin, linë e dhenve”, e shpreh ai idenë e vet në mënyrë alegorike.

Re.Pu.