Qeveria Greke përcakton kufijtë detarë në mënyrë të njëanshme. Shqetësohet vetëm për reagimin e Turqisë (e aspak të Shqipërisë)

Qeveria greke po vlerëson mundësinë për të depozituar në Kombet e Bashkuara koordinatat e kufijve të jashtëm të shelfit kontinental grek dhe zonave ekonomike ekskluzive (EEZ), të përcaktuara në mënyrë të njëanshme dhe sipas gazetës “To Vima”, kjo mund të bëhet në muajt e parë të vitit 2013.

Gazeta raporton se idea e shpalljes së njëanshme, që mbështetet edhe nga kryeministri Andonis Samaras, mund të shkaktojë episod të nxehtë me Turqinë dhe reagime nga vendet e tjera fqinje, cituar nga Express në Prishtinë.

Siç thuhet në raport, Agjencia ka përfunduar punën e saj dhe diskutimet vazhdojnë në departamentet përkatëse të ministrisë së Jashtme për trajtimin juridik të kësaj nisme dhe depozitimin e saj në OKB, megjithatë ka kundërshtime për koordinatat e depozitave, pasi ekziston frika në lidhje me kolapsin e bisedimeve me Turqinë, ndërsa reagojnë edhe vendet e treta, që janë kundër veprimeve të njëanshme. Greqia do ta marrë këtë vendim pa përfillur dhe Shqipërinë, pasi marrëveshja e vitit 2009 mbi zonat ekonomike ekskluzive mes dy vendeve, u shpall e pavlefshme nga Gjykata Kushtetuese e Shqipërisë.

Lajmi, ku shteti grek vendos vetë edhe për ne për kufijtë tanë, duket nuk i ka kilikosur dot mediat e qeverisë. Aktivisti Andi Kananaj komenton në twitter se “Greqia po çon në OKB çeshtjen e kufijve, territor ky që përmban naftë sa 3 herë borxhi grek. Por, për Tv Klan, lajmi nuk vlente sa sherri me thika në Ersekë” k.c.