Messi apo Maradona? Pas ndeshjes së mbrëmshme, ndokush ka zënë të thotë “Maradona”

Leo Messi apo Diego Armando Maradona? Në fillim ishin të sigurtë se Maradona është më i madhi. Më tej, kur Messi fitoi ca pjekuri më shumë e zuri të demonstronte se kush ish në të vërtetë, mendimet ishin të ndara. Dhe kur Messi filloi të shpërthente, të thyente rekorde si golashënues e të merrte Topa të Artë njëri pas tjetrit, peshorja anoi nga Pleshti. Të shumtët sot mendojnë se ky i fundit është më i madh se El Pibe d’Oro.

Gazetari sportiv italian, Tommaso Pellizzari, që shkruan për të përditshmen il Corriere della Sera, mbron një qëndrim të kundërt. Sidomos, qysh nga mbrëmja e djeshme, kur Barça humbi qartazi me Milanin me rezultatin 0-2, dhe kur Messi, si rrallë herë, ishte i padukshëm, nuk dha asnjë assist, nuk gjuajti asnjëherë në portë e, rrjedhimisht, nuk shënoi asnjë gol. “Nuk është hera e parë që Messi nuk bie në sy me skuadrat italiane”, thotë gazetari në fjalë. “Në nëntë ndeshje që ka bërë me Interin, Milanin e Udinesen, ai ka shënuar vetëm tri herë, dhe të trija herët me penallti”, saktëson.

Ç’do të thotë kjo? Tommaso Pellizzari ka një arsyetim të vetin. “Messi është mësuar në kampionatin spanjoll, ku skuadrat e dorës së dytë janë taktikisht të dobëta, dhe futen në fushë me idenë budallaqe për të luajtur si të barabartë me Barça-n apo Realin. Dhe prandaj, Messi bën shumë gola. Kur i duhet të luajë me skuadra që janë shumë të përgatitura taktikisht, siç janë këto italianet, Messi pëson fiasco. Ndërsa Maradona u ka bërë gol të gjitha skuadrave italiane. Dhe u ka bërë gola të të gjithë llojeve, nga të gjitha pozicionet”, thotë ai në thelb.

Ka të drejtë? Apo është ende nën eksitimin e fitores së mbrëmshme të Milanit, që mund të zhvleftësohet në ndeshjen e kthimit?

Re.Pu.