Kume: KQZ nuk ka gabuar me hapjen e kutive. Sollaku: KQZ ka kryer një vepër penale

Lidhur me vendimin e KQZ-së për hapjen e kutive për qarkun e Lezhës e të Shkodrës, ish kreu i KQZ-së Kristaq Kume nuk sheh shkelje të ligjit. Në një intervistë që ka dhënë për Panoramën,ai thotë, se “KQZ-ja mund të vendosë për hapjen e kutive në mënyrë, që të realizojë një hetim të thelluar administrativ, [dhe se] kur e sheh të arsyeshme duhet të marrë prova në kuti; ligji i ka krijuar hapësira KQZ-së, por nuk e detyron atë”.

Ndërsa ish kreu i Prokurorisë së Përgjithshme, Dhori Sollaku ka një mendim të kundërt: “Vendimi i KQZ-së ishte i kundraligjshëm; madje, kjo shkelje përbën vepër penale; në asnjë dispozitë të kodit zgjedhor nuk jepet kompetenca e KQZ-së për të hapur kutitë me votat e vetëm katër anëtarëve”.

I intervistuar po nga Panorama, Sollaku në këtë diskutim kapet pas një çështjeje tjetër. “Ky veprim i gabuar i KQZ-së ka dhe një anë të mirë; nëse vërtetohen manipulime, përgjegjësit duhet të detyrohen të përgjigjen para ligjit”, thotë ai, duke lënë të kuptohet se është rast i mirë për të ndëshkuar ata që deformojnë rezultatin e zgjedhjeve.

Re.Pu.