Basha u votua edhe si delfin i Berishës, edhe për sjelljen e tij ndryshe nga Berisha, thotë Preç Zogaj

Në një analizë të botuar sot në gazetën Mapo, Preç Zogaj jep një këndvështrim të ri për arsyet që sollën fitoren e Lulzim Bashës në krye të Partisë Demokratike. Sipas tij, fitorja e kryebashkiakut të Tiranë është aq e thellë sa nuk lë vend për pikëpyetje. “Në bindjen time, të mbështetur  edhe në testime të rastit që kam bërë në Tiranë, Lezhë dhe në Vlorë, Basha ka marrë vota, sa për shkak të  përshtypjes që ka si delfin i Berishës, aq  edhe për arsyen e kundërt, që në sjelljen dhe qëndrimet e tij nuk reflekton  ato sjellje që më kanë shtyrë mua  të formuloj dikur termin “berishizëm”, si tundim për pushtet absolut, deri në  mosrespektim të parimit të pavarësisë së pushteteve, shkruan Zogaj. Nga ana tjetër, ai u jep një këshillë atyre që kundërshtojnë procesin, duke shtuar se nëse nuk kanë fakte për shkelje të fshehtësisë  së votimit, për futje votash apo manipulime në numërim, do të ishte mirë t’i urojnë fitoren kryetarit të ri të PD-së, zotit Basha. “Bashkimi rreth liderit të ri është një prej kushteve  të dorës së parë që PD të bëjë shumë mirë opozitën sot dhe të përgatitet për fitoren nesër”, mendon Zogaj.

Re.Pu