Analiza “e mbyllur” e Burgajt. Krimi bën kërdinë, krerët e policisë luajnë “policësh”

Nuk është e thënë që analizat e kupolës drejtuese të policisë së Shtetit të jenë të hapura për mediat, si fjala vjen, shpeshherë mbledhjet e qeverisë. Tek e fundit, puna e policisë duket tek rezultatet konkrete në terren. Kësisoj, analiza me dyer të mbyllura që bëri sot kryepolici Hysni Burgaj me drejtorët e qarqeve, nuk është për t’u marrë me rezervë në vetvete. Por kur dhuna e kriminaliteti i çdo niveli bëjnë kërdinë, nga ai mafioz tek ai ordiner, ndërsa Drejtoria e Përgjithshme e Policisë së Shtetit vazhdon të manipulojë shifrat për situatën e rendit dhe të heshtë për republikat tona të hashashit, atëherë logjikshëm që krerët e bluve do mblidhen pas dyerve të kyçura. Dhe do japin pastaj deklarime si emaili që lëshoi Burgaj pas mbledhjes: “Pavarësisht faktit se për periudhën 8-mujore ka një rënie të numrit të veprave penale me 708 vepra më pak krahasuar me të njëjtën periudhë të një viti më parë, po ashtu dhe një rënie të numrit të vrasjeve me 7 më pak, objektiv parësor i punës së të gjitha strukturave të Policisë së Shtetit duhet të jetë parandalimi dhe goditja e kriminalitetit, në mënyrë të veçantë e krimeve të rënda siç janë vrasjet”. Pra, pavarësisht se kemi punuar shkëlqyeshëm, ka vend për përmirësime.

Këto ditë, një kontroll i brendshëm mbi turnin e natës mes policëve të Tiranës, i gjeti shumicën e tyre ose në gjumë, ose në kafene.   

a.k