Shastiset trajneri holandez i PAOK-ut: Çfarë bëri Kaçe që e pezulluat?

Hub Stivens, holandezi i njohur që drejton PAOK-un e Selanikut, nuk ka mundur dot ta kuptojë se çfarë kishte bërë aq të rëndë lojtari I tij Ergys Kaçe, që ta meritonte këtë ndëshkim të çuditshëm. Ai doli kundër vendimit të klubit për pezullimin e korcarit, pasi sipas holandezit, lojtari nuk ka bërë asgjë për t’u pezulluar dhe ca më tepër për t’u trajtuar në këtë mënyrë jo vetëm nga tifozët, por edhe nga klubi.

“Mendoj se po e ekzagjerojnë shumë me Kaçen. Ai është një djalë i ri dhe, nëse klubi gjykon se ka gabuar, i duhet dhënë një shans i dytë, paçka se unë gjykoj se nuk ka bërë asgjë të keqe. Mendoj se Kaçe është një futbollist që i duhet kësaj skuadre dhe duhet të kthehet sa më parë në stërvitje për të qenë i gatshëm dhe për të dhënë kontributin e tij për PAOK-un”, është shprehur Stivens në mediat greke. Shfaqja e një fotoje të Kaçes i veshur me një fanellë me stemën e UÇK-së, degjeneroi aq shumë sa ai u pezullua pa afat nga klubi, kurse familja e tij, për arsye sigurie, u largua për në Itali.

a.k