“MAPO”: Debatet e ditës/ Cinizëm dhe zero fantazi në politikë, PD dhe PS thjeshtë ndërruan portat

Kryeministri Edi Rama i bëri thirrje opozitës që të heqë dorë nga veprimet kundër marrjes së statusit kandidat. Rama ka përsëritur në këtë mënyrë Berishën kryeministër që po ashtu akuzonte se protestat e opozitës dhe qëndrimet e saj si anti integrim, ndërsa nga ana tjetër opozita në një “kopjim” të metotave të Ramës në opozitë ka ngritur (mbështetur) çadrat e grevës para kryeministrisë. Politikës shqiptare duket se i ka shteruar fantazia edhe pse cinizmi e ironia e çadrave para kryeministrisë duket e përsosur. Se sa e gjithë kjo lojë në të cilën kanë ndërruar vetëm portat do të ndikojë në marrjen e statusit mbetet e paqartë.

“Po u provoni cdo ditë shqiptarëve se kush jeni dhe pse keni nuk keni qenë shumicë asnjë ditë. Nuk dini të bëni gjë tjetër vetëm të veproni kundër statusit për Shqipërinë. Dua t’u them një gjë për ata që ju përfaqësoni, se të ishte për ju…Unë dhe Ministrja e Mbrojtjes marrim përgëzime nga partnerët tanë për atë që po bëjmë dhe nuk janë përgëzime që kanë të bëjnë me shkëmbimet mes shteteve, por përgëzime për rezultatet konkrete që  ne kemi arritur”, tha Rama.  Kryeministri i drejtoi disa pyetje opozitës.

“Si është e mundur që në prill të vitit të kaluar është kapur 1.1 ton hashash, në prill të këtij viti u kap 5.1 ton? Pse ju shqetëson droga e kapur ju? Si e keni hallin? Që po kapet kaq shumë drogë? Se ky është hall që edhe kur na pyesin s’dimë cfarë të themi. Cfarë keni ju që në prill janë arrestuar 30 përqind më shumë trafikantë? Si shpjegohet që 750 përqind është rritur sasia e kokainës së kapur në të njëjtën periudhë. Në kohën tuaj nuk hynte kokainë? Në kohën tuaj kokaina hynte, por nuk dilte më”, tha Rama.

Ashtu si Rama disa kohë më parë i pyetur për ndikimin që mund të ketë protesta te statusi, Basha tha se kjo ishte një provë se në Shqipëri ka një demokraci funksionale dhe se nuk ishte opozita që po pengonte statusin.  “Ne identifikojmë opozitën dhe aksionin e saj si prova më e qartë e një demokracie funksionale në Shqipëri. Ne jemi e vetmja opozitë në Ballkan që ka lobuar dhe lobon për statusin. Statusin e meriton Shqipëria dhe shqiptarët. Por situata është bërë më e vështirë nga arroganca qeveritare. Ne kemi qëndrimin tonë ‘zero kusht për integrimin, mbështetje për statusin’. Ne jemi të pakthyeshëm për ta fituar betejën kundër kartelit të drogës”, theksoi ai. Ai akuzoi se me milionat e fitura nga droga mund të blihen deputetë, ministra, policë. “Vetëm sasitë e kapura në periudhën janar-prill kanë një vlerë prej rreth 300 milionë eurosh. Po sasitë e pakapura? Ku shkojnë gjithë këto lekë? Me këto lekë do blejnë deputetë, ministra, policë, etj”, tha Basha në një intervistë për Top-Channel. Të njëjtat qëndrime ndërkohë janë mbajtur edhe në kuvend, ku deputetët e PS kanë pretenduar se protestat e PD dhe greva e urisë po bëhen për të penguar statusin. Berisha dhe Topalli e deputetë të tjerë të PD-së janë përgjigjur se Shqipëria e ka merituar statusin dhe se ka qenë PS pengesa që ai nuk është marrë deri tani.

*Shënim i Mapo Online