Humbëm apo fituam me CEZ-in? Ministri Ahmetaj thotë në “Top-Story” se Shqipëria doli e fituar

Pak a shumë të gjithë kanë menduar se me CEZ-in, Shqipëria humbi. Humbi sidomos në aspektin financiar, por edhe në atë të shërbimit me qytetarët. Mirëpo nuk duket se mendon kështu ministri i Ekonomisë Arben Ahmetaj, sipas të cilit akti i fundit i riblerjes së CEZ-it për 95 milionë e nxori Shqipërinë të fituar. Kjo pasi sipas Ahmetajt vendi rimori pasurinë e vet mbrapsht, por edhe interesat. Por kjo fitore është natyrisht relative. Relative sidomos po të mendohet arbitrazhi, në të cilin sipas ministrit Shqipëria nuk kishte asnjë shans. Një arsye për këtë ai nxori edhe atë që e quajti “ndërhyrje idiotike të policisë në një stacion”, pavarësisht se protesta kishte në krye deputetë të PS-së. Ky fakt i është kujtuar Ahmetajt, që gjithsesi ka nënvizuar se në bilanc të fundit Shqipëria nuk ka humbur. Kjo ndoshta është e vërtetë, varet sesi i qasesh analizës, por një e vërtetë tjetër është edhe se kundrejt CEZ-it pati protesta edhe ne Bullgari. Pra keqmenaxhimi është përgjegjësi e çekëve, që e përdorën gurin e tyre për të dhënë një po për statusin. Dhe ky fakt i është vënë për diskutim ministrit edhe nga moderatori Sokol Balla, por edhe nga i ftuari Arjan Vasjari që e ka konsideruar veprimtarinë e CEZ, si kriminale kundrejt qytetarëve.  

s.z