Ksamili vendos traun: Njëqind lekë të reja për çdo makinë, taksë “turistike”. Këtij i thonë turizëm

Ka ngjallur debate vendimi i fundit i këshillit komunal të Ksamilit: Tashmë çdokujt që do i duhet të shkojë për pushime në Ksamil, do i duhet të paguajë 100 lekë të reja. Kjo taksë do aplikohet për çdo automjet. Komuna e Ksamilit ka nisur vendosjen e 6 trarëve në rrugët e plazhit. Aktualisht, komuna po vendos një tra në rrugën e “Kinoteatrit”, dhe ka bërë me dije se trarët po vendosen për turistët, të cilët duhet të paguajnë këtë shumë për mjetet e tyre.  Ky vendim, sipas kreut të kësaj komune, Besnik Abedini, u vendos në mbledhjen e Këshillit. “Pagesa do të jetë vetëm për turistët”, ka sqaruar kreu i Komunës së Ksamilit. Por ky vendim ka sjellë reagimin e vetë banorëve të Ksamilit, sipas të cilëve vendosja e trarëve është absurde dhe do dëmtojë turizmin. Me ca llogari të thjeshta, komuna duhet ta dijë se shpenzimet ditore të një familjeje me makinë kur vjen për plazh në Ksamil, sjellin përfitime të atilla që nuk i bëjnë të nevojshme njëqindlekëshat. Përkundrazi, kjo masë e çuditshme mund të sjellë efekt bumerang.

a.k