Zonja Shkoza dhe zoti Mita në gojën e Kryeministrit

"Pas vizitës që bëri te zonja  Shkoza, e cila kishte pa i dhënë Ministrisë 140 milionë lekë nga fondi i 2KR, zoti Rama u ndal edhe te Genci Mita i firmës ‘SEGEA’, e cila njëlloj si firma ‘Shkoza’, debitore e ndjeshme ndaj kredisë pa interesa që ka marrë. Kjo qeveri i ka dhënë kredi dhe ky tani me borxhe del dhe mbledh vota”.

Këto janë fjalët që Kryeministri Berisha i ka thënë para disa ditësh në mbledhjen e Grupit Parlamentar të PD-së. Mentor Nazarko është marrë me këtë në editorialin e tij në të përditshmen Panorama dhe ka bërë mirë.

Shkruan Nazarko: "Kjo fjali të habit për shumëçka, ashtu si të tregon disa gjëra shumë të qarta... Me hyrjen në detaje kaq të hollësishme për njerëzit të cilët ka takuar kryetari i opozitës, zoti Rama, Kryeministri dëfteu se ndjek me vëmendje jo vetëm çdo veprim të Ramës, por edhe çdo veprim të atyre që takon Rama. Dhe duke qenë se Rama takon shumë njerëz, atëherë i bie që Kryeministri ndjek me vëmendje veprimet e shumë njerëzve që takon Rama. Kjo ndjekje me siguri nuk është diçka për t’u entuziazmuar. Është e vërtetë se nuk është Kryeministri që rrëmon nëpër gjendje civile apo gjetkë për të gjetur biografinë aktuale të njerëzve që takon Rama – me to merren të tjerë -, por as kjo nuk është frymëzuese. Për të menduar pozitivisht, do të duhet të pranojmë se gjetja e zonjës Shkoza apo e zotit Mita dhe pastaj studimi prej tij i biografive respektive, thënia e tyre botërisht duhet të jetë diçka shumë e rëndësishme. Kryeministri merret me sende të rëndësishme apo ka interes për gjëra të rëndësishme, dhe s’mund të dyshojmë për këtë..."

Nazarko e quan më pas një kërcënim të hapur këtë sjellje: "Nëse Kryeministri u mor me emrat dhe historitë personale të personave me të cilët takohet rivali i tij Rama, në këtë angazhim të ri (i ri si fushë veprimi sepse si metodologji është e vjetër) të tij ka me siguri diçka të frikshme. Kjo është e frikshme pse shohim zgjimin apo konsolidimin e instinkteve të tij biografike, që vijnë nga koha e komunizmit, njëlloj siç bëri me grevën e ish-të përndjekurve, nga ku doli viktima e parë. Kjo duhet të jetë e frikshme dhe për ata që e kanë takuar dhe mund ta takojnë kryetarin e PS-së, zotin Rama: imagjinoni presionin mendor që ndien një njeri anonim që papritmas bëhet subjekt i një lufte elefantësh të politikës. Me një fjalë, në përmendjen emërore të këtyre njerëzve në publik ka kërcënim jo vetëm për ata që janë takuar, por dhe për ata që do ta takojnë kryetarin e opozitës, - shkruan ai. (a.th.)

Nazarko i plotë:

http://www.panorama.com.al/2012/11/08/lufta-per-fshatin/