Vizitë e një zyrtari të lartë amerikan në Tiranë; takimi i dytë me Ilir Metën

Drejtori për Evropën Qendrore dhe Jugore në Departamentin e Shtetit Amerikan, Jonathan Moore, filloi sot nje vizitë zyrtare në Tiranë. Takimi i parë i tij nuk ishte me ndonjë zyrtar qeveritar shqiptar, por me kreun e opozitës, Edi Rama.

Pas takimit me Ramën, Moore nuk u takua me ndonjë përfaqësues të PD-së në qeveri, por me Ilir Metën e LSI-së.

Sipas Balkanweb, Meta e falenderoi z. Moore për vizitën në Tiranë si dhe për mbështetjen e fortë dhe të vazhdueshme që SHBA i jep Shqipërisë në kuadër të forcimit të institucioneve demokratike dhe në rrugëtimin e integrimit evropian.

Duke folur për situatën politike në Shqipëri, Meta shprehu zhgënjimin e LSI-së për bllokimin artificial e të panevojshëm të prioriteteve të parealizuara që nevojiten për marrjen e statusit të vendit kandidat në Bashkimin Evropian.

Jonathan Moore, pasi vlerësoi rolin e Shqipërisë në NATO, rikonfirmoi dëshirën e SHBA për një ecuri më të shpejtë të reformave dhe për t’a parë Shqipërinë një ditë në Bashkimin Evropian, atje ku vendi i saj është.

Biseda mes z. Meta dhe z. Moore u përqendrua në ecurinë e procesit të integrimit evropian të Shqipërisë me fokus zhvillimet e brendshme politike në vend, në përgatitjet për fushatën elektorale të vitit të ardhshëm si dhe në politikën rajonale të vendit.

Z. Meta rikonfirmoi pozicionin e Lëvizjes Socialiste për Integrim për një politikëbërje sa më konstruktive dhe të moderuar, brenda dhe jashtë vendit, në shërbim të interesave primare të qytetarëve shqiptarë, duke theksuar se sfida kryesore e politikës shqiptare tashmë mbetet evitimi i retorikës konfliktuale dhe realizimi i zgjedhjeve demokratike, të lira dhe transparente në qershor 2013.
Re. Pu.