Venizelos-Bushati, ja që ka ca probleme mes fqinjëve

Takimi mes dy ministrave të Jashtëm dhe konferenca e përbashkët e shtypit, zbuloi sesa nuk është aq kollaj të zbatosh politikën “zero probleme me fqinjët”. Kështu, Bushati kërkoi me “delikatesë” që Greqia të heqë ligjin e luftës, ndërsa Venizelos deklaroi se “gjendjen e Paqes mes Shqipërisë dhe Greqisë e ka shpallur qeveria greke që në vitin 1987. Madje që në vitin 1986. Gjithkush që ka diçka për të kërkuar diçka tek kuadri ligjor grek, ka të drejtën që t’i drejtohet Gjykatës së Strasburgut”. Bushati u pyet për çështjen çame dhe tha se “ajo që njihet si çështja çame është pjesë e dosjes tonë me diplomacinë dhe sot sipas pikëpamjes tonë është momenti që realiteti të shihet në sy. Të tejkalohen pengesat historike një nga një sepse duam të pasurojmë gamën e bashkëpunimit rajonal dhe jo t’i lëmë terren nacionalizmit folklorik”, ndërsa homologu grek pohoi se nuk e njeh këtë çështje.

Pra, edhe pse realisht tonet mes dy kryediplomatëve ishin ato të vullnetit për të tejkaluar çdo ngërç, fakti është që problemet dypalëshe ekzistojnë. Dhe një nga çështjet e nxehta mbetet ajo e ndarjes së hapësirës detare, për të cilën tha se kjo u duhej më shumë nga pikëpamja ekonomike, për shkak të zonave ekskluzive ekonomike.

a.k