Vendimi i 7255-të, i fundit i qeverisë Berisha, ndërrimi i emrit nga Bjeshkët e Namuna në të Bekuara! Të shohim sa do të ngjisë!...

Kryeministri Sali Berisha ka publikuar në faqen e tij në Facebook foton e fundit të kabinetit qeveritar, si dhe mesazhin e lamtumirës, ku u shpreh mirënjohje bashkëpunëtorëve.  

Në fjalën e tij të të fundit fare në qeveri, Berisha theksoi se ka ndryshuar në këto tetë vite historinë dhe gjeografinë e Shqipërisë….Dhe një nga këto ndryshime duket se është ndryshimi i emrit të Bjeshkëve të Namuna, për të cilin është marrë një vendim.

“Të dashur miq, sot ishte mbledhja e 425-të dhe e fundit e dy mandateve të mazhorancës së PD. Në 7255 ligje, akte normative dhe vendime të miratuara në këto mbledhje si dhe qindra e mijëra veprimtari të tjera kombëtare dhe ndërkombëtare u ndryshua në mënyrë përfundimtare historia, gjeografia dhe roli gjeostrategjik i Shqipërisë dhe shqiptarëve,” shkruan Berisha në FB.

 Dhe një nga këto ndryshime duket se është ndryshimi i emrit të Bjeshkëve të Namuna. “Këtu ka shumë vendime, janë vendimet për lirimin nga detyra të zëvendësministrave, të cilat miratohen, por është edhe një vendim për Bjeshkët e Namuna, të cilat do të quhen Bjeshkët e Bekuara… Ato janë një mrekulli natyrës, janë magjepsëse, janë të mrekullueshme. Ftoj me këtë rast edhe qeverinë e Malit të Zi edhe qeverinë e Kosovës që të marrin të njëjtat vendime. Sa më shumë shqiptarë të shkojnë atje, aq më të bekuara do të quhen,” tha Berisha në mbledhjen e fundit të qeverisë.

Megjithëse me vendim qeverie, të shohim sa do të ngjisë ky emër!

Zh.