Urrejtje ne web për boss-ët e policisë, që kanë drekuar me të akuzuarin për vrasjen e Lamajt

Të gjitha të përditshmet (me përjashtim të atyre qeveritare) kishin publikuar sot fotot e një numri drejtuesish të policisë me të akuzuarin për vrasjen e ish komisarit Dritan Lamaj. Madje, Dita kish publikuar dhe një foto të njërit syresh me të akuzuarin në stadium (ishin pranë e pranë), duke rrëzuar kështu alibinë e boss-ëve të policisë, se fotoja në restorant ka qenë e rastësishme, dhe se arben Frroku u është ulur në tavolinë si “fan” i tyre.

Në versionet online të gazetave, dhe në blog-jet e rrjetet sociale, kanë shpërthyer komentet fyese, përbuzëse e plot urrejtje kundër këtyre njerëzve, që kanë nën komandë policinë e republikës. “Barkderra, mafiozë, kriminelë, etj., etj”, janë disa nga termat, me të cilat lexuesit janë shfryrë. Por shumica e tyre nuk merren me këta persona. Merren me boss-in e tyre, kryeministrin, që ditën e vrasjes së Dritan Lamajt kish gjetur kohë të bënte një listë me romancierë e këngëtarë të preferuar, por jo të thosh një fjalë për atentatin vrastar që i ish bërë një funksionari të lartë të policisë.

Binte në sy dhe një numër i vogël komentuesish, që s’e kishin për gjë, si në çdo rast, të justifikonin e të merrnin në mbrojtje policët në fjalë.

Re.Pu.