Tregjet e ish uzinës Dinamo dhe Qytetit të Nxënësve do të mbyllen. Vendim unanim bashki-prefekturë

Në raste si ky bashkëpunimi e gjen rrugën e vet. Task Forca e ngritur nga Prefekti i Tiranës në bashkëpunim edhe me Bashkinë e Tiranës ka vendosur mbylljen përfundimtare të tregut të ish-Uzinës Dinamo në Tiranë edhe atij në ish-qytetin e nxënësve. Sipas relacioneve të paraqitura nga të gjithë aktorët e kësaj Task Force janë konstatuar mangësi të theksuara në struktura dhe të kushteve higjieno-sanitare në tregun e ish-Uzinës Dinamo, ndërkohë që në tregun “Hamdi Pepa” shumica e objekteve janë kioska shitjeje që sipas Task Forcës nuk plotësojnë as kushtet minimale për tregtimin e produketeve ushqimore. Nga ana tjeter, shpesh nga këto subjekte ka shkelje të ligjshmërisë fiskale të cilët sfidojnë në mënyrë të hapur institucionet e administratës shtetërore. Mbledhja e radhës e Task Forcës e cila kryesohet nga Prefekti Sadi Vorbsi, nënkryetari i Bashkisë, Enno Bzodo, Drejtori i Agjencisë Kombëtare të Ushqimit, Tiranë, drejtoria e Rajonale e Mjedisit, kreu i Policisë Bashkiake e të tjerë doli me një vendim për mbylljen përfundimtare të këtij tregu. Ky vendim do të ekzekutohet nga Policia Bashkiake dhe ajo Shtetit. Ndonëse e kishin paralajmëruar dhe vetë dhe në një farë mënyre e prisnin një vendim të tillë, tregtarët duken të habitur dhe paralajmërojnë protesta, pasi mendojnë se vendimi nuk lidhet me kushtet higjenike, por me lirimin e hapësirës për të ndërtuar.

a.k