Totozani prezanton kandidatët për Komisionerë: Janë dy juristë të verbër

Igli Totozani ka ‘materialuar’ sot idenë e hedhur disa ditë më parë që komisioneri i ri i Avokatit të Popullit do jetë një jurist nga radhët e njerëzve me aftësi të kufizuar. Totozani ka dalë sot para mediave me dy kandidatët, emrat e të cilëve i kanë shkuar Parlamentit për votim.

Në një njoftim të kabinetit të Totozanit për mediat, shkruhet: “Dy kandidaturat e përzgjedhura janë: Ermir Kapedani i diplomuar në Universitetin e Tiranës, Fakulteti i Drejtësisë (1996) dhe i diplomuar në Universitetin e Tiranës, Fakulteti Ekonomik, Dega Administrim Biznes (2010- në vazhdim). Kapedani ka qenë Drejtor projektesh me fokus në fushën e të drejtave të njeriut, kryesish të personave me aftësi të kufizuar. Kandidatura e dytë është Ardjan Hysa i diplomuar në Universitetin e Elbasanit , Dega Juridik (2001) me titullin Avokat pranë Dhomës së Avokatëve, Elbasan”.

Të dy juristët e propozuar janë të verbër. Gjatë prezantimit të tyre sot Totozani është shprehur:  “Nëpërmjet këtij propozimi ne synuam të zgjedhim së pari dy juristë të mirë nga aftësia e kufizuar, të cilët do të punojnë për mbrojtjen dhe promovimin e të drejtave të qytetarëve duke sjellë në institucion sensibilitetin e këtij grupi shoqëror. Ne dëshirojmë të kontribuojmë për një Shqipëri Europiane, për një Shqipëri moderne, të vlerave të vërteta, kundër tabuve dhe paragjykimeve. Dëshirojmë të japim jo vetëm një shans të barabartë për aftësinë e kufizuar, por edhe një shans për shoqërinë dhe vendin, për ekonominë, politikën dhe kulturën tonë, për të shfrytëzuar këtë kapital njerëzor të pamatshëm dhe të nënvlerësuar deri tani”. A.N.