Thirrje publike drejtuar qeverisë shqiptare në lidhje me grevën e urisë së të burgosurve politikë

Një grup gazetarësh/publicistësh/veprimtarësh i kanë bërë një thirrje publike qeverisë shqiptare për të adresuar nevojat immediate dhe afat-gjata të të ngujuarve në grevën e urisë të të burgosurve politikë që po zhvillohet prej 10 ditësh në lagjen Komuna e Parisit në Tiranë.

“Sot mbushen plot 21 vjet që shteti shqiptar ka pranuar se i ka burgosur pa të drejtë të dënuarit politikë, me aktin e Kuvendit të Shqipërisë që e njohu këtë fakt me votë unanime. Çdo shtet ku sundon shteti i së drejtës i dëmshpërblen shtetasit që i ka burgosur pa të drejtë. Ka ardhur koha, për të mos thënë që ka kaluar, që edhe shteti shqiptar të sillet si një shtet i së drejtës. Do të ishte një krim i madh për shtetin tonë në prag të 100-vjetorit të pavarsisë së vendit, që të dënuarit politikë të vdesin në grevë urie, sepse nuk dëmshpërblehen për burgimin e tyre të padrejtë”, theksojnë nënshkruesit e kësaj thirrje publike.

Teksti i plotë i thirrjes vijon më poshtë.

Re.Pu.

*********************************

Thirrje publike drejtuar qeverisë shqiptare

Të shqetësuar nga gjendja shëndetësore e të burgosurve politikë të ngujuar në grevën e urisë, të cilët një nga një po përfundojnë në spital;

Të indinjuar nga injorimi i plotë që i kanë bërë autoritetet shtetërore kësaj greve urie;

Të zhgënjyer nga mënyra sesi janë trajtuar të burgosurit politikë nga të gjitha qeveritë e derisotme të Shqipërisë;

1-     U bëjmë thirrje autoriteteve shtetërore që urgjentisht t’u ofrojnë grevistëve shërbim shëndetësor 24-orësh

2-     I bëjmë thirrje qeverisë shqiptare që urgjentisht të dërgojë përfaqësuesit e saj për të dëgjuar drejtpërdrejt nga të ngujuarit grevistë kërkesat e tyre.

3-     I bëjmë thirrje Ministrisë së Financave që të zbatojë detyrimin ligjor për dhënien e dëmshpërblimit të burgosurve politikë, në kushtet kur pritet të futen në thesarin e shtetit të ardhura të paparashikuara nga privatizimet

Sot mbushen plot 21 vjet që shteti shqiptar ka pranuar se i ka burgosur pa të drejtë të dënuarit politikë, me aktin e Kuvendit të Shqipërisë që e njohu këtë fakt me votë unanime. Çdo shtet ku sundon shteti i së drejtës i dëmshpërblen shtetasit që i ka burgosur pa të drejtë. Ka ardhur koha, për të mos thënë që ka kaluar, që edhe shteti shqiptar të sillet si një shtet i së drejtës. Do të ishte një krim i madh për shtetin tonë në prag të 100-vjetorit të pavarsisë së vendit, që të dënuarit politikë të vdesin në grevë urie, sepse nuk dëmshpërblehen për burgimin e tyre të padrejtë.

Fatos Lubonja, publicist

Maks Velo, publicist

Alfred Peza, gazetar

Skënder Minxhozi, gazetar

Aleksandër Çipa, gazetar

Beti Njuma, gazetare

Mimoza Dervishi, gazetare

Etleva Bisha, gazetare

Andrea Stefani, opinionist

Auron Tare, publicist

Ilir Hashorva, publicist

Delina Fico, veprimtare për të drejtat e njeriut.

Blerta Kraja, veprimtare për të drejtat e njeriut.

Diana Ndrenika, vepriumtare shoqërore

Eduard Zaloshnja, opinionist