Taksë e drejtë nga pikpamja sociale, por efektive nga pikpamja ekonomike?

Në një lajm të mëparshëm (http://www.respublica.al/artikuj/2013/01/15/une-do-jem-taksa... ), raportuam se sonte Edi Rama ka riprekur në fjalimin e tij para të rinjve edhe çështjen e shumëdebatuar të taksimit. “Ne do të qeverisim me drejtësi [sociale]. Qeveritarët do të paguajnë më shumë taksa se sot, ndërsa mësuesit, mjekët e policët më pak. Kryeministri do të jetë taksapaguesi më i madh në sektorin publik,” tha Rama me rastin e 21-vjetorit të themelimit të FRESH-it.

Mirë drejtësia sociale, po ekonomia? Mirë mësuesit, mjekët e policët, etj., etj., etj., do të paguajnë më pak taksa, kur socialistët të vendosin taksën progresive, po çfarë efekti do të ketë kjo mbi ekonominë?

Duke lënë më shumë para në duart e atyre që kanë të ardhura të vogla ose të mesme (që përbëjnë shumicën dërrmuese të shqiptarëve), krijohen premisat që të rritet konsumi – pra, të blihen më shumë ushqime në dyqanin e vogël të lagjes apo në qendrën e madhe tregtare jashtë qytetit. Dhe rritja e konsumit do të ndihmonte pronarët e bizneseve të vogla, si edhe atyre të mëdha. Dhe këta të fundit, eventualisht, mund të rrisin investimet për të shtuar kapacitetet prodhuese/tregtuese, duke rigjallëruar kështu motorin e mekur të ekonomisë së sotme.

Të gjitha këto do të kishin kuptim vetëm nëse administrata e ardhshme socialiste do jetë e aftë të reduktojë evazionin fiskal. Përndryshe, ekonomia mund ta pësojë nga deficiti buxhetor…

E.Zaloshnja