Takimi i ditës: Rama ka merak ‘të mllefosurit’, ndërsa Meta bën një résumé të bisedës

Rama e merr me mend, me sa duket, se takimi i tij me Metën është një takim që do të shoqërohet me dyshime, diskutime, moskuptime, keqkuptime, qejfmbetje, etj, dhe prandaj, teksa po ndahej me Metën e gjeti me vend të thosh dy fjalë për ‘të mllefosurit’: “Atyre që mllefosen, po u them se kur flasim për dialog don të thotë dialog edhe mes kundërshtarëve.” Dhe më poshtë, ka këmbëngulur t’i bindë ‘të mllefosurit’ mbi dobinë e takimit duke u kapur pas ‘thelbit të çështjes’: “Shqipërisë i duhet sot një President, i cili garanton në radhë të parë kapërcimin e provës për statusin e vendit kandidat, pavarësinë e institucioneve dhe të jetë një garant për të gjithë shqiptarët.”

Në fakt, Meta përmendi më shumë se sa një çështje, kur foli për temat e bisedës. Përveç zgjedhjes së Presidentit, ai përmendi dhe reformën zgjedhore, reformën parlamentare dhe imunitetin. Kanë folur vërtet për gjithë këto çështje në harkun e një ore? Si zor. Kështu që i mbetet të kenë folur veç për Presidentin. Kuptohet, nëse s’kanë folur për ndonjë gjë që është më e rëndësishme se Presidenti, fjala vjen plani për t’ia hequr spinën Berishës. Por ky është muhabet i gjatë (nëse është një muhabet që është bërë); nuk mund të mbyllet me një takim a dy.

M.N.