Ta ketë gjetur komisioneri Fyle përgjigjen e pyetjes që postoi në mëngjes në Twitter?

“Erdha për të diskutuar çështjen më thelbësore të shtetit modern shqiptar - ç’duhet bërë për zgjedhjet që ato të mos kontestohen”  - postoi në mëngjes në rrjetin social, Twitter, Komisioneri për Zgjerimin, Stefan Fyle.

Në mbrëmje, pas takimeve në Tiranë, u shpërnda edhe një deklaratë nga zyra e Komisionerit për Zgjerimin:

“Komisioneri nënvizoi gjatë bisedimeve të tij në Tiranë që zhvillimi i suksesshëm i zgjedhjeve parlamentare të 2013 do të jetë një test kyç për funksionimin e mirë të institucioneve demokratike të vendit. Ai u bëri thirrje politikanëve të zhvillojnë zgjedhjet e qershorit në përputhje me standardet ndërkombëtare, të përmirësojnë besueshmërinë dhe reputacionin e institucioneve demokratike dhe të forcojnë përgjegjshmërinë e politikanëve kundrejt qytetarëve shqiptarë. Komisioneri i diskutoi këto çështje edhe me komunitetin ndërkombëtar në Shqipëri, përfshirë edhe përfaqësuesit e OSBE-së”.

Deklarata nuk ka ndonjë përgjigje konkrete për pyetjen që vetë z.Fule shtroi në Tëitter para takimeve. Vërtet, “ç’duhet bërë për zgjedhjet që ato të mos kontestohen?” Pyetje e bukur pas nxjerrjes jashtë loje të KQZ-së nga Kolegji Zgjedhor dhe Kuvendi. Ky i fundit vendosi me forcën e kartonëve të mos marrë parasysh lëvizjet demografike të popullsisë për të bërë ndarjen e mandateve. Ç’përgjigje të ketë formuluar në kokën e tij komisioneri Fyle? (a.th.)