Të tjera amendime në Kodin Rrugor. Kursi i ndihmës së shpejtë të mos bëhet nga Kryqi i Kuq, por nga një agjenci me çertifikatë ndërkombëtare

Deputetët e Komisionit të Sigurisë debatuan mbi amendimet që po i bëhen Kodit Rrugor lidhur me kursin e ndihmës së shpejtë. Propozimi për t’ia hequr këtë të drejtë Kryqit të Kuq dhe për t’ia dhënë subjekteve të liçensuara nga një agjenci e specializuar ndërkombëtare është kundërshtuar nga deputeti Pjerin Ndreu. Sipas tij, pas këtyre ndryshimeve të Kodit Rrugor fshihen interesa klienteliste.  “Është e padrejtë, është antiligjore, është një diskriminim për agjencitë tona. Kjo lë vend për klientelizëm.”-, është shprehur Ndreu. Por kreu i komisionit të Sigurisë, Spartak Braho ka sqaruar se një ndërhyrje e tillë në ligj është bërë pikërisht për të shmangur klientelizmin. “ Për të rritur nivelin dhe mos krijuar keqkuptime është menduar që organizata që do marrë përsipër dhënien e ndihmës, testimin dhe lejen të perzgjidhet nga institucione ndërkombëtare, me qëllim që të mos ia lëmë këtë gjë klientelizmit”-ka theksuar Braho.

l.m