Svoboda (mëse i drejtpëdrejtë): Rama, kryeministri i ardhshëm, Berisha bllokues i integrimit, shkoni masivisht në votime

Presidenti i Grupit Socialist dhe Demokrat në Parlamentin Europian, Hannes Svoboda ka qenë mëse i drejtpërdrejt kësaj here në komentet mbi situatën në Shqipëri dhe zgjedhjet e qershorit. Gjatë një takimi me Edi Ramën në Bruksel, Svoboda citohet nga TCH të ketë thënë:

“Së pari jam shumë i kënaqur të takohem përsëri ashtu siç jemi takuar shumë shpesh gjatë muajve të fundit, me Edi Ramën, kryetarin e Partisë Socialiste. Shoh te ai tani liderin e opozitës, por dhe kryeministrin e ardhshëm. Ky është mesazhi im. Ju duhet ta bëni të mundur tani të ndryshoni drejtimin e vendit. Berisha dhe qeveria e tij kanë bllokuar tanimë për shumë e shumë vjet edhe fillimin e negociatave për integrimin. Njerëzit duhet të jenë të motivuar të shkojnë në zgjedhje të votojnë. Ne do të bëjmë ç’është e mundur si palë europiane të kontrollojmë zgjedhjet në kuptimin që të jetë një votim korrekt sipas ligjit, mos jetë i keqpërdorur, sepse për një herë të vetme ne duam zgjedhje të qarta dhe korrekte dhe sigurisht zgjedhje me një votë të qartë të qytetarëve për të ndryshuar drejtimin e vendit, për të luftuar realisht korrupsionin, për të luftuar vërtet për kohezion social. Është kaq e rëndësishme sa njerëzit duhet të përdorin këtë mundësi dhe të votojnë” (a.n.)

Foto LSA: Sali Berisha, Ilir Meta dhe Hannes Svoboda, gjate nje takimi te Komisionit te Partneritetit te Kartes se Adriatikut në Dubrovnik.