Sondazh i Fondacionit Kult: PS kryeson, AK e treta

Fondacioni Kult, me qendër në Tetovë, ka prezantuar sot në Tiranë rezultatet e një sondazhi të opinionit publik në Republikën e Shqipërisë, në lidhje me pikëpamjet e popullsisë në moshë madhore rreth bashkimit kombëtar dhe përkrahjen e elektoratit për partitë e ndryshme politike të vendit, raporton televizioni A1 Report. Kampioni i sondazhit u përbë prej 1200 të intervistuarve dhe kishte një marzh gabimi statistikor prej 3.1 pikë përqindje.

Sipas sondazhit, ndër votuesit që e kanë ndarë mendjen se për cilën parti do të votojnë, 36.5% do ta jepnin votën për PS-në, në qoftë se zgjedhjet do të zhvilloheshin sot. E dyta renditej PD-ja me 29.6% dhe e treta AK-ja me 14.1%. Më pas vinin LSI dhe FRD me 4.7% dhe 4.1%. Në këtë grup votuesish, 7.8% refuzuan ta tregonin preferencën e tyre. (Ndoshta nga frika?)

Për bashkimin e Shqipërisë me Kosovën, para se të ndodhë bashkimi me Evropën, ishin shprehur 64% e të anketuarve.
E.Zaloshnja