Socialistët janë të idesë se “data 6 gusht është data 6 gusht”; asgjë më tepër

Dita e sotme, si rrallë herë, na ka bërë të shohim një Edi Rama hiper-aktiv. Pas letrës për kancelarin austriak, ai ka dalë në një intervistë për Top-channel-in, ku ka folur për ndërhyrjet në kushtetutë e për projekt/ligjin për imunitetin. “Partia Socialiste nuk do të votojë më 6 gusht”, ka thënë ai, dhe po aty është përpjekur ta çmistifikojë e ta shfryjë këtë date-tollumbace, të cilën fillimisht e ka përmendur ambasadori Arvizu (që tani duhet të ketë nisur pushimet) e më pas është bërë datë e dashur për Berishën. Por duket se socialistët nuk po e lënë lënë veten të shushaten nga presioni i datës: “Data 6 gusht nuk përfaqëson asgjë, nuk është as një datë historike, as një datë simbolike. Është një datë e vendosur arbitrarisht, duke copëtuar në mes një proces, i cili duhet të jetë plotë dhe i integruar, procesi i diskutimit të ndryshimeve kushtetuese, bazuar në propozimet që janë në tryezë. Të gjitha ato propozime duhet të diskutohen dhe pastaj duhet të votohen. Ne nuk votojmë edhe në gusht edhe në shtator për të ndryshuar Kushtetutën”, është shprehur Rama, duke nënvizuar në fund se “ne do të votojmë njëherazi për të gjitha propozimet, dhe sigurisht për gjëra që kemi rënë dakord do të votojmë pro”.

Re.Pu.