Si lajmet e faqes 4 të Zërit të Popullit - tallet Vehbiu me deklaratën e MPJ-së kundër Koresë së Veriut

“Ministria e Punëve të Jashtme, duke dënuar këtë akt, i bën thirrje Qeverisë koreano-veriore që të ndërpresë menjëherë këto veprime, të cilat janë provokime të rënda  dhe që ndikojnë negativisht në mjedisin e sigurisë rajonale dhe më gjerë...”. Kjo është një deklaratë e MPJ për një provë bërthamore të kryer ditët e fundit nga Koreja e Veriut.

 “Ja edhe një lajm tronditës: Ministria e Punëve të Jashtme e Republikës së Shqipërisë ka dënuar ashpër provën bërthamore të kryer nga ana e Qeverisë së Koresë së Veriut. Njoftimi, i cili ka dalë edhe në faqen zyrtare të ministrisë, është rimarrë nga një numër gazetash dhe me siguri është transmetuar edhe në TV-in satelitar. Jo po ta dinë!...” – tallet me këtë reagim në blogun e tij Ardian Vehbiu dhe shton:

 “Mua, që e lexova duke e shoqëruar në mendje me marshe luftarake të ekzekutuara me bandë frymore, kjo e tanishmja më kujtoi ca deklarata të njëhershme të MPJ koreanoveriore, për dhunimin e hapësirës ajrore të atij vendi nga avionët spiunë amerikanë, që i përcillte me zell të paparë “Zëri i Popullit” në faqen 4, madje edhe duke u bashkëlidhur një numër rendor: incidenti no. 2462, incidenti no. 2463, etj. Koreanët i numëronin, këta u shkonin pas avazit. Nuk di se çfarë ka pikërisht Koreja e Veriut, që ta bëjë kaq irrelevante për punët shqiptare – ndoshta distanca, ndoshta fakti që si shtet na kujton diktaturën tonë totalitare. E megjithatë, nuk pres të bëjë njeri festë në Tiranë e gjetiu në Shqipëri, ditën kur të rrëzohet Kimi i tanishëm dhe të vendoset edhe atje “demokracia”, si në Shqipëri...” a.n.

Vehbiu i plotë:

http://xhaxhai.wordpress.com/2013/02/13/flake-per-flake/