Si e shpjegon Pacolli mosnjohjen e Kosovës nga vendet myslimane

Bexhet Pacolli është intervistuar nga gazetarja Ilva Tare dhe ndër të tjera flet edhe për pjesën e njohjeve të Kosovës nga vendet e Afrikës dhe nga ato arabe. “Vëmendja ime është përqëndruar në Afrikë. E kam vizituar 48 shtete, nga 54 të tilla, jam takuar me 48 presidentë, ka qenë e vështirë. Duke ju falenderuar energjisë sime dhe miqve të mi, deri tani kemi 26 njohje, presim të tjera, premtimin që kam dhënë për 100 njohje deri në fund të vitit do të bëhet. Tani pres njohje edhe nga vende të fuqishme” – thotë Pacolli për vendet afrikane. Ndërsa pyetjes së Tares: Si e shpjegoni mosnjohjen nga disa vende arabe? – ai i përgjigjet:

“Është mentaliteti i tyre dhe lidershipi i këtyre vendeve është një lidërship i vjetëruar. Jugosllavia e atëhershme i ka ndihmuar shumë vendet myslimane, ka pasur miqësi të mirë me to. Një tjetër është dhe fakti se ai lidership që ka qenë në krye të tyre nuk ekziston po ashtu edhe Jugosllavia nuk ekziston më. Ne si vend mysliman kemi menduar se bota islame na e jep vetë, nuk kemi lobuar dhe është dashur ta bëjmë. Ato vende ku kemi shkuar dhe pse kanë hezituar  e kanë bërë. Jam duke punuar me Egjiptin, do kem një vizitë para vitit të ri dhe njohja e tij do jetë kyç..” - A.N.