Shtypi italian mbi vizitën e Renzit dhe 'Il Giornale' që kritikon klimën shend e verë mes dy kryeministrave

Në shtypin italian është nënvizuar vizita në Tiranë e kryeministrit Matteo Renzi si një gjest domethënës që fqinji ynë i përtejAdriatikut bën në mbyllje të semestrit të vet në krye të presidencës së BE-së. "Ballkani është zemra e Europës; Italia është sponsori kryesor i Shqipërisë", këto ishin mesazhet që i kishin bërë përshtypje Alessandra Arachi-t, që ish dërguar në Tiranë prej së përditshmes së njohur 'Il Corriere della Sera'. Kjo gazetare kish veçuar dhe ngjashmëritë mes dy kryeministrave: kanë qenë kryebashkiakë, janë bërë kryeministra, dhe janë të dhënë pas batutave ironike, shakave e pas selfie-ve. "Sikur të mos kish ndodhur tragjedia me tragetin 'Norman Atlantic', konferenca për shtypin do të ish një 'ping-pong batutash, ledhash mirësjelljeje dhe një konfirmim i aleancës mes të dyve", ia bën ajo.

"I dhashë dum punës që ta mbyllja në Tiranë semestrin tonë europian, pasi këtu është një copë e vërtetë e Europës së ardhshme", citohej Renzi në të përditshmen progresiste 'La Repubblica'. Ndërsa në 'La Stampa' nxirrej në pah një mesazh tjetër i kryeministrit italian në Tiranë: "Shpresoj që Europa e nesërme të jetë një shtëpi e shpresës dhe i ëndërrave, e jo një botë shtrëngimesh, detyrimesh, e burokracie". Dhe tok me të, reporterit të kësaj gazete i kish mbetur në mendje pyetja e një kolegu të tij nga Tirana: "Pse vallë ju të dy, Rama e Renzi, kryeministra të majtë, bëni reforma të djathta"? Që të dy thanë se "kjo nuk është e vërtetë".

Gazeta konservatore 'Il Giornale' del nga kori, dhe kritikon klimën shend e verë mes të dyve: "Fytyrat e shtendosura, të relaksuara e të qeshura të të dy kryeministrave janë në kontrast me humorin e keq të vendeve që janë duke qarë viktimat e tragetit 'Norman Atlantic'". Dhe kanë saktësuar se "kjo mendjelehtësi e shkujdesje (leggerezza, në versionin italisht) ka shkaktuar polemika të ashpra në Itali".

Që të gjitha gazetat nuk kanë harruar të komentojnë video-selfi-n e Ramës e të theksojnë garancitë që ky i fundit u dha sipërmarrësve italianë: "Hajdeni dhe investoni në Shqipëri, pasi së pari taksat nuk janë më të larta se 15%, dhe së dyti, në ndryshim nga në Itali, nuk ka sindikata që ta bëjnë jetë të vështirë". Kjo puna e sindikatave nuk mund t'i linte indiferentë gazetarët italianë, të cilëve u duhet shpesh të raportojnë mbi beteja e manifestime të sindikatave të tyre kundër qeverive të Romës.

Re.Pu.