Shqipëri më e madhe? Apo Shqipëri më e mirë? - pyet Schmitt (dhe tallja me filoturqizmin e çuditshëm skënderbejan)

Historiani austriak Oliver Jens Schmitt, i njohur në Shqipëri nga përkthimet e të ndjerit Ardian Klosi ka botuar një opinion të gjatë në të përditshmen “Neue Zuercher Zeitung”, ku merr në analizë tendencën e fundit të kreut të qeverisë shqiptare për të çuar në ekstrem tonet nacionaliste.

Historiani ngre pyetjen se përse Shqipëria kërkon të shkatërrojë reputacionin e mirë si një faktor stabiliteti në rajon? (përgjigja është: për nevoja elektorale). Te kjo puna e nevojave Schmitt shton edhe se S.Berisha njihet për këto lloj manovrimesh pa sens: shkon në Turqi dhe u thotë atyre se shqiptarët kanë gjak të përbashkët me turqit, por s'e ka problem që njëherazi të shkojë tek Papa dhe të prezantojë veten si "pasues i Skënderbeut" - raporton TemA.

Schmitt bën një krahasim për të dhënë idenë se çfarë duan në të vërtetë shqiptarët. “Simboli i dytë i festimeve ishte një e ashtuquajtur “Tortë e Pavarësisë”, e madhe 550 metra katror, shpërndarja e të cilës në Tiranë dështoi nga presioni i njerëzve. Pamjet e njerëzve që hanin copa torte, mbushnin qeset plastike dhe në fund kërcenin mbi tortë.. sjellin një imazh të kundërt me fjalimet bombastike. Dhe ndoshta thonë më shumë në lidhje me marrëdhënien e qytetarëve me shtetin dhe dëshirat e vërteta të shumicës së shqiptarëve. Intelektualët kritikë shkojnë direkt në thelb: alternativat janë një Shqipëri më e madhe, apo më e mirë? Elita politike është duke preferuar të paktën në retorikë opsionin e parë” - A.N.