Shifra që flasin për një popullsi drejt plakjes: “Në 1989-n ne kemi pasur 1 milion fëmijë të moshës nën 15 vjeç, ndërsa në 2011-n, 575 mijë”

Shqiptarët po i afrohen popujve me moshë mesatare 40 vjeç. Krahasuar me prirjen e para disa viteve, kjo flet shumë, pasi shqiptarët ishin popullsia me moshën më të re në Europë. Shifrat flasin vetë: “Nëse do të shikojmë piramidën moshore të vitit 2011, do të shikojmë që kemi një mungesë të grupmoshës 35-55 vjeç. Kjo tregon që një pjesë e madhe e kësaj grupmoshe kanë emigruar jashtë vendit. Sot Europa ka një moshë mesatare prej 42 vjeç, ndërsa ne parashikohet që t’i afrohemi kësaj moshe mesatare rreth vitit 2032”, tha Mirela Muça, eksperte e çështjeve sociale. Më domethënëse janë të dhënat kur i referohemi fëmijëve. Brenda 26 vjetëve fëmijët e moshës nën 15 vjeç gati janë përgjysmuar si kategori. “Në 1989-n ne kemi pasur 1 milion fëmijë të moshës nën 15 vjeç, ndërsa në 2011-n kemi 575 mijë të tillë. Vërehet që trendi i kësaj grupmoshe vjen duke u ulur me një shpejtësi shumë të madhe”, thotë Muça. Kjo rënie shumë e shpejtë parathotë pasoja ekonomike dhe sociale.
http://www.top-channel.tv/mobile/artikull.php?id=294532