SHBA-të skeptike me premtimin e Putin për Ukrainën

Shtetet e Bashkuara të Amerikës nuk e kanë marrë seriozisht premtimin e bërë nga Presidenti rus Vladimir Putin. Reagimi për premtimin e Putin në lidhje me votën e ukrainasve ditën e dielë ka ardhur nga Shtëpia e Bardhë nëpërmjet zëdhënësit të saj, Jay Carney.

“Ne e presim me kënaqësi një shenjë nga rusët ku tregojnë se do të pranojnë rezultatet e zgjedhjeve të lira, të drejta dhe demokratike në Ukrainë”, ka thënë zëdhënësi i Shtëpisë së Bardhë, Jay Carney. SHBA-ja mesa duket po tregohet e kujdesshme ndaj premtimeve të presidentit rus Vladimir Putin.

Uashingtoni akuzon prej disa javësh Rusinë se po destabilizon me vetëdije Ukrainën. “Për momentin ne jemi të përqendruar në mbarëvajtjen e zgjedhjeve në mënyrë të lirë dhe të drejtë”, theksoi Carney. Presidenti rus deklaroi sot se do të respektonte vendimin e popullit ukrainas dhe do të punonte me kreun e zgjedhur të shtetit. “Në fund të fundit ne duam që të rikthehet qetësia në Ukrainë, ne do të respektojmë vendimin e popullit ukrainas”, kjo ka qenë deklarata  e Putini në Shën Pjetërburg. S.S