Shënim: Ku janë 150 mijë vendet e reja të punës që premtoi LSI-ja?

A ju kujtohet që, kur firmosi koalicionin qeverisës me Berishën, Ilir Meta theksonte fort se një nga “kushtet e forta” që kishte vënë për atë koalicion ishte që qeveria të adoptonte politika që do të realizonin premtimin elektoral të LSI-së për hapjen e 150 mijë vendeve të reaj të punës gjatë mandatit qeverisës? Tani që jemi një vit para mbylljes së këtij mandati, le t’i hedhim një sy statistikave që jep INSTAT-i i Berishës për punësimin. Në faqen zyrtare të internetit të këtij institucioni (http://www.instat.gov.al/) është një nyje e emërtuar “Bilanci i Forcave të Punës”. Duke klikuar në të shkohet në një tabelë që jep ecurinë e këtij treguesi nga janari i 2010-ës deri në prill të 2012ës. Dhe ç’na tregon kjo tabelë?

Numri i të punësuarve në sektorin privat bujësor ka mbetur konstant, sepse llogaritet në bazë të numrit të familjeve që kanë një copë tokë në fshat. Ndërsa numri i të punësuarve të tjerë (në sektorin privat urban dhe atë shtetëror) është rritur me vetëm 22 mijë. Shumë larg shifrës prej 150 mijë të premtuar nga LSI-ja!

Sidoqoftë, LSI-ja një kusht të marrëveshjes me PD-së në lidhje me punësimin e ka realizuar. Sipas deklaratave të eksponetëve LSI-stë, marrëveshja për punësimin në 20% të administratës të përkrahësve të saj është zbatuar plotësisht. Kjo do të thotë se rreth 33 mijë LSI-stë (165000 X 20%) janë punësuar në sektorin shtetëror, ndërkohë që ky sektor nuk është rritur gjatë këtyre viteve. Me fjalë të tjera, 33 mijë përkrahës të PD-së i kanë lënë vendin 33 mijë përkrahësve të LSI-së…

E.Zaloshnja