Shëngjin, mbytet vogëlushja nga Kosova, Tare thekson mosbashkëpunimin lokal për rojet e plazhit

Verë dramatike sa u përket aksidenteve fatale me pushues në bregdet kjo e këtij viti. Një ngjarje e rëndë u shënua pasdite në plazhin e Shëngjinit, kur 8- vjeçarja Gabriela Çeta nga Kosova, është shkëputur për një moment dhe është futur në det, pa mundur të dalë më. Sapo e kanë pikasur, pushues dhe të afërmit e saj nuk kanë arritur ta shpëtojnë. Këtë herë autoambulanca mbërriti menjëherë në vendngjarje për të dhënë ndihmën e parë, por vogëlushja nuk ka arritur të mbijetojë. Çifti kosovar nga Prizreni dhe fëmija i tyre, ndodheshin me pushime prej 1 jave në Shëngjin. Kreu i Agjencisë Kombëtare të Bregdetit, Auron Tare, akuzoi autoritetet lokale në Shëngjin për mospranimin e bashkëpunimit për vendosjen e rojeve bregdetare në plazh. Problemi ndërkohë, siç kanë vërejtur edhe qytetarë që kanë sinjalizuar përmes rrjeteve sociale, është se shpesh këto roje mungojnë edhe aty ku infrastruktura është përgatitur.

a.k